კორიპოს თემი დაახლოებით 600 წლის წინათ შეიქმნა. XIX საუკუნეში აქ 300-მდე მცხოვრები იყო, მაგრამ ახლა სოფელში სულ 16 ადამიანია დარჩენილი - 15 პენსიონერი და 1 მერი. ახალგაზრდებმა სოფელი დიდი ქალაქების გამო მიატოვეს.
კორიპო ერთადერთი შვეიცარიული სოფელი არაა, რომელიც სულს ღაფავს. ეს მას შემდეგ დაიწყო, რაც ტრადიციული სოფლის მეურნეობა მთაში არარენტაბელური გახდა. ახლა კორიპოში არც მაღაზიაა, არც სკოლა და არც ბავშვები. არადა სოფელი ქალაქ ლოკარნოდან, სულ რაღაც, 30 წუთის სავალზე მდებარეობს, მაგრამ მთის ვიწრო გზაზე სიარულს ბევრი ვერ ბედავს.
კორიპოში 60 ტრადიციული ქვის სახლი უპატრონოდაა დარჩენილი. ზოგი მოკვდა, ზოგიც წავიდა და ძველ სახლში პირადი ნივთები დატოვა. იმისთვის, რომ სოფელი სიკვდილისგან ეხსნა, ხელისუფლებამ ზოგი სახლის სასტუმროდ გადაკეთება გადაწყვიტა.
მსგავსი „გაფანტული სასტუმროები“ ზოგიერთ იტალიურ მთის სოფელში უკვე მოქმედებს და ახლა შვეიცარიამაც გადაწყვიტა ამ გამოცდილების გამოყენება. დიზაინერებს დიდი გარჯა მოუწევთ, რათა ისტორიულ ძეგლად შერაცხული სოფლის გარეგნობა არ შეცვალონ და თან ტურისტებსაც კომფორტული პირობები შეუქმნან.
