რისკების შეფასების ფედერალური ინსტიტუტისა (გერმანია) და სინქროტრონული გამოსხივების ევროპული ცენტრის (საფრანგეთი) სპეციალისტებმა
დაამტკიცეს, რომ პიგმენტები და ტოქსიკური მინარევები ორგანიზმში მიკრო და ნანო ნაწილაკების სახით „მოგზაურობს“ და ეს იმ წამიდანვე იწყება, როგორც კი სხეულზე ტატუ დაიხატება.
კვლევის ავტორების განცხადებით, ტატუირების მსურველები ფიქრობენ ოსტატის ხელოვნებაზე და ხელსაწყოების სტერილურობაზე, მაგრამ არ უფიქრდებიან მელნის ქიმიურ შემადგენლობას.
დღემდე ტატუს სალონებში გამოყენებული მღებავი ნივთიერებების შესახებ ბევრი არაფერი იყო ცნობილი. ბევრი მელანი ორგანულ პიგმენტებს, კონსერვანტებსა და მავნე ნივთიერებებს - ნიკელს, ქრომს, მარგანეცსა და კობალტს შეიცავს.
მელნის ყველაზე უფრო გავრცელებული შემადგენელი ტექნიკური ნახშირბადი და ტიტანის ორჟანგია. პირველი შავ ფერს იძლევა, მეორე კი - თეთრს. ტიტანის ორჟანგი, ასევე, ფართოდ გამოიყენება საკვებ დანამატებში, მზისგან დამცავ მალამოებსა და საღებავებში. ხშირად ტატუირებაზე თეთრი ფრაგმენტების მფლობელები კანის ქავილსა და გაძლიერებულ მგრძნობელობას უჩივიან.
სპეციალისტებმა ტიტანის ორჟანგი კანსა და ლიმფურ სისტემაში აღმოაჩინეს. ჯანმრთელობისთვის მიყენებულ ზიანზე ჯერ საბოლოო დასკვნები არ დადებულა.
მეცნიერები მხოლოდ ვარაუდობენ, რომ ამან შეიძლება ლიმფური კვანძების გადიდებამდე და კანის ანთებამდე მიგვიყვანოს.
მეცნიერთა შემდგომი ნაბიჯი ტატუიან ადამიანებზე ხანგრძლივი დაკვირვება და ამგვარი მხატვრობის ხანგრძლივმოქმედი გვერდითი მოვლენების დადგენა იქნება.