ადამიანს ორი ტიპის ცხიმი აქვს. თეთრი ცხიმი ზედმეტ ენერგიას ტრიგლიცერიდების წვეთების სახით ინახავს. რუხ ცხიმს ეს წვეთები უფრო მცირე ზომისა აქვს და მეტ მიტოქონდრიას შეიცავს, რომელიც ცხიმებს წვავს და სითბოს გამოყოფს. ახლად დაბადებულებს რუხი ცხიმი მეტი აქვთ, რომელიც მათ დაბალი ტემპერატურისგან იცავს. სამაგიეროდ, მოზრდილების ორგანიზმში ის შედარებით ნაკლებია.
მეცნიერები დიდი ხანია ეძებენ საშუალებას, რომელიც მოზრდილ ადამიანებში თეთრ ცხიმს რუხად გარდაქმნის - ეს ბუნებრივად მხოლოდ მაშინ ხდება, როცა სხეული სიცივეს გრძნობს. ასეთი საშუალება ზედმეტი წონისა და დიაბეტისგან კარგი თერაპია იქნებოდა. მართალია, ამგვარი რამდენიმე წამალი არსებობს, მაგრამ ისინი ან ინექციის ანდა აბების სახითაა და ამიტომაც გვერდითი ეფექტები აქვს.
ახლა ამ პრეპარატებს 250 ნანომეტრის სიდიდის ნანონაწილაკებით გადასცემენ (შედარებისთვის, ადამიანის თმის სისქე 100 000 ნანომეტრია). ნანონაწილაკები ერთი კვადრატული სანტიმეტრის ფართის, მიკროსკოპული ნემსების მქონე სალბუნზე განათავსეს. ისინი უმტკივნეულოდ ხვრეტენ კანს და წამალს ნელ-ნელა უშვებენ კუნთში.
წამლის მიღების ახალი ხერხი მსუქან თაგვებზე გამოსცადეს. თაგვებს სალბუნს მუცლის ცალ მხარეს ოთხი კვირის განმავლობაში ადებდნენ. შედეგად მათ მუცლის ამ მხარეს ცხიმი 20%-ით შეუმცირდათ. ამას გარდა, შეუმცირდათ სისხლში შაქრის შემცველობაც.