ოპერაციას ჩინეთში მდებარე ხარბინის სამედიცინო უნივერსიტეტის ნეიროქირურგი სიაოპინგ რენი ხელმძღვანელობდა, რომელიც კანავერომ თავის გუნდში ჯერ კიდევ 2 წლის წინათ გადმოიბირა. რენის მსგავსი ოპერაცია 1000 სხვადასხვა თაგვზე აქვს გამოცდილი. 10-საათიანი პროცედურის შემდეგ თაგვები სუნთქავდნენ, სვამდნენ და ხედავდნენ კიდეც. თუმცა რამდენიმე წუთზე დიდხანს ვერცერთმა ვერ იცოცხლა.
თავად სერჯიო კანავერომ კი გასულ წელს თავის გადანერგვა წარმატებით განახორციელა მაიმუნზე. ნაოპერაციებმა მაიმუნმა 20 საათი იცოცხლა, შემდეგ კი დააძინეს.
აღსანიშნავია, რომ კანავერო სამედიცინო წრეებში ადამიანის თავის გადანერგვის ამბიციური პროექტით არის ცნობილი, მაგრამ ევროპასა და აშშ-ში მის ამბიციებს სკეპტიკურად უყურებენ. ბევრი პროფესიონალი მედიკოსი ამ პროცედურას შეუძლებელს უწოდებს და ასეთი რთული ქირურგიული ოპერაციიდან გადარჩენის შანსს ვერ ხედავს.
კანავერომ ჯერ კიდევ 2015 წელს განაცხადა, რომ GEMINI-ს პროტოკოლის მიხედვით იწყებს ადამიანის თავის გადანერგვის პროექტს. ეს განსაკუთრებული პროცედურაა, რომელიც დონორის თავის სხვა სხეულზე გადანერგვისას თავისა და ზურგის ტვინების შეხორცებას ითვალისწინებს.
მაშინ დაანონსდა კიდეც, რომ პირველი პაციენტი რუსი პროგრამისტი ვალერი სპირიდონოვი უნდა ყოფილიყო, რომელსაც დაავადების იშვიათი ფორმა, ვერდნიგ-ჰოფმანის დაავადება სტანჯავს, თავად ოპერაცია კი მოსკოვში უნდა ჩატარებულიყო, თუმცა შემდგომ ოპერაციის ჩატარება ჩინეთში გადაწყვიტეს.