მაგრამ როგორ გადავაბიჯოთ მძინარე მეზობელს? ფეხებით სავარძელზე "შევდგეთ" თუ მძინარე სხეულზე ბალანსირება მოვახდინოთ? ავიაკომპანია British Airways-ის მიერ ამას წინათ მოწყობილმა გამოკითხვამ აჩვენა, რომ მგზავრების 80%-ს მეზობლის გაღვიძება მისაღებად მიაჩნია, მაგრამ 40% მიიჩნევს, რომ ეს ფრენის განმავლობაში მხოლოდ ერთხელ შეიძლება გაკეთდეს. მაგრამ თუკი ფრენა რვა საათზე მეტხანს გრძელდება, მაშინ უკვე პრობლემის წინაშე ვდგებით.
გამოკითხულთა მესამედი აცხადებს, რომ მძინარეს გადააბიჯებს. "გადამბიჯებელთა" 54% ამ მანევრს ისე შეასრულებს, რომ მძინარეს ზურგს არ მიუშვერს.
ეთიკის დარგში ექსპერტებმა უილიამ ხენსონმა და ჯო ბრაიანტმა გამოკითხვის შედეგები გამოიკვლიეს და მივიდნენ დასკვნამდე, რომ ყველაზე კარგი გამოსავალია, თუკი ამ სიტუაციას მეზობლის დაძინებამდე შეათანხმებთ. შესაძლოა, ადგილების გაცვლაც მოახერხოთ, რათა ფრენისას უხერხული ვითარება არ შეიქმნას.
მაგრამ ფორსმაჟორის შემთხვევაში, როცა მძინარე მგზავრზე გადაბიჯება მაინც გვიწევს, უნდა ვეცადოთ და ფიზიკური კონტაქტი მინიმუმამდე დავიყვანოთ. და საერთოდ, თუკი დარწმუნებული არ ხართ, რომ შეუმჩნევლად მოახერხებთ გადასვლას, მაშინ სჯობს, მეზობელი გააღვიძოთ.
ავიაკომპანიამ, ასევე, გამოიკითხა, ვის „ეკუთვნის“ ცენტრალური საიდაყვე? ბრიტანელთა 67% მას მეზობელს უთმობს, ხოლო ფრანგები ცდილობენ, ის საერთოდ არ ჩამოწიონ.
კითხვაზე: მისაღებია თუ არა ფეხსაცმლის გახდა, რესპონდენტთა 78% ამაში საშინელებას ვერ ხედავს, მთავარია, წინდებიც არ გაიხადონ.
ამას გარდა, გამოკითხულთა უმრავლესობამ განაცხადა, რომ ცდილობენ, მოთმინებით აიტანონ ხვრინვა, ხოლო აფრენის შემდეგ ადგილის გამოსაცვლელად ამჯობინებენ, ჯერ ბორტგამცილებელს შეუთანხმდნენ.
