ესკობარის ერთ-ერთი მთავარი სახლი კოლუმბიაში ქალაქ მედელინში მდებარეობს, სწორედ აქ გაიზარდა ცნობილი ნარკობარონი. ეს ოდესღაც დიდებული სასახლე ნელ-ნელა ნანგრევებად იქცევა და ნადგურდება. ამის მიუხედავად, ესკობარის სახლის ნახვის მსურველთა რიცხვი არ კლებულობს.
ესკობარმა მამული 1982 წელს შეიძინა, ქალიშვილის დაბადების შემდეგ. სახლს ორფენოვანი კედლები ჰქონდა, რათა ღრეჩოში ფულისა და ნარკოტიკების დამალვა ყოფილიყო შესაძლებელი. სასახლის ტერიტორიაზე სტუმართა სახლი, ვერტმფრენის მოედანი, აუზი, ტენისის კორტი და საფეხბურთო მოედანი იყო.
დღეს ამ სასახლეს პეინტბოლის მოედნად იყენებენ. ნებისმიერ მსურველს 75 დოლარად შეუძლია ჩაატაროს თამაშის სეანსი - „პოლიციელები ნარკობარონების წინააღმდეგ“.
მამული ოფიციალურად სახელმწიფოს საკუთრებაშია, მაგრამ მასზე პრეტენზიას მისი ყოფილი მომვლელიც აცხადებს. მისი აზრით, მან მამულში 20 წელზე მეტი იმუშავა და გარკვეული უფლებებიც აქვს.