სავაჭრო ცენტრში სულ მალე ერთ-ერთი გლობალური ბრენდის სუპერმარკეტი განთავსდება. სუპერმარკეტის გარშემო კი კომერციული ფართები განლაგდება.
კომერციული ფართების მშენებლობა ნაწილობრივ დასრულებულია და დასრულებულ ნაწილში ფართების დაქირავება უკვე შესაძლებელია.
„აქსისის“ სავაჭრო ცენტრი ფუნქციონირებას 2016 წლის ბოლოსთვის დაიწყებს.
„თიბისი ბანკის“ დირექტორის მოადგილემ დავით წიკლაურმა და „აქსისის“ გენერალურმა დირექტორმა გიორგი კაპანაძემ ერთობლივი პროექტის შესახებ დღეს „აქსისის“ ოფისში გამართულ პრესკონფერენციაზე ისაუბრეს.
„თიბისი ბანკი“ „აქსისთან“ წლებია, ნაყოფიერად თანამშრომლობს და დაფინანსებული აქვს არაერთი პროექტი. მოხარული ვართ, რომ დედაქალაქს კიდევ ერთი თანამედროვე პროექტი შეემატება“,- ამბობს „თიბისი ბანკის“ დირექტორის მოადგილე დავით წიკლაური.
„სავაჭრო ცენტრის მშენებლობა „აქსის პალასი 1“-ის კონცეფციის სრულყოფილად შესრულებისთვის კიდევ ერთი წინგადადგმული ნაბიჯია. მოხარული ვართ, რომ საშუალება გვაქვს, ვითანამშრომლოთ ისეთ პარტნიორთან, როგორიც „თიბისი ბანკია“. ძალიან დიდი მოლოდინი გვაქვს იმისა, რომ პროექტი წარმატებული იქნება. ჩვენ შევისწავლეთ ბაზარი და კვლევამ ძალიან კარგი შედეგი აჩვენა. კომპლექსი სამ მნიშვნელოვან ქუჩას უკავშირდება - ბახტრიონის, საბურთალოსა და გამრეკელის ქუჩებს (ყოფილი კუტუზოვის ქუჩა)“, - აცხადებს „აქსისის“ გენერალური დირექტორი გიორგი კაპანაძე.
„აქსის პალას 1“ მრავალფუნქციური კომპლექსია, რომელიც ქ. თბილისში, ცინცაძის N12-ში მდებარეობს. პროექტის დიდი ნაწილი უკვე დასრულებულია. კომპლექსში, საცხოვრებელ ფართებთან და ოფისებთან ერთად, მოქმედი კომერციული ფართებიც არის განთავსებული.