მანიკა ასათიანი საჭესთან: „დამიჯერებთ, რომ გვერდით არასდროს ვიყურები?“

საჭესთან

18 სექტემბერი 22:00, 2015 წელი
94

„ერთხელ, მახსოვს, ჩემთვის, მობილიზებულად მივდიოდი და გვერდიდან რომ ვერ მიიქცია ჩემი ყურადღება, გამასწრო, ლუქიდან ამოვიდა და რაღაცებს ხელების ქნევით მეუბნებოდა“, - გვიყვება მოდელი, ტელეწამყვანი და ჟურნალისტი მანიკა ასათიანი, რომელიც მართლაც შეუძლებელია, „მერსედესის“ საჭესთან ვერ შეამჩნიო.

- მართალია, იდეალური მძღოლი არ ვარ, მაგრამ კომპლიმენტი ხშირად მიმიღია. როცა მამაჩემი და ჩემი ქმარი შემაქებენ ხოლმე, ეს დიდ რამეს ნიშნავს ჩემთვის. ვინმე ცუდად თუ ჩამიჭრის გზას ან სახიფათო მანევრს გააკეთებს, შეიძლება, გავცხარდე, მაგრამ სიმშვიდესა და ქალურობას არასდროს ვკარგავ. დიდი-დიდი, ჩუმად ჩავილაპარაკებ: დეგენერატი.
ასე რომ, საჭესთან მამაკაცური საწყისები ჩემში არ ირთვება (იცინის). 


- გაქვს ისეთი ნივთი მანქანაში, რომელსაც ყოველდღიურად ატარებ?
- ასეთია სათვალე, რომელიც სახლში არ ამაქვს და სულ მანქანაში ვტოვებ. და მუსიკალური დისკები. ასევე, სარკეზე მიკიდია ჯვარი, რომელიც თავად ვიყიდე ეკლესიაში და მიდევს სამი წმინდანის ხატი. ასე მგონია, ეს ყველაფერი გადაადგილებების დროს მიცავს. სხვათა შორის, არ მიყვარს ათასი ნივთით მორთული მანქანა. ჩაცმულობაშიც ვერიდები გადაზედმეტებას და, მით უმეტეს, მანქანაში. სისადავე, როგორც ადამიანს, ისე მანქანასაც უხდება. ზოგადად, გოგოშკური, პატარა მანქანებიც არ მომწონს, უფრო მამაკაცური მანქანები მიყვარს.


- შენი ხელით თუ გაგირეცხავს მანქანა?
- მიუხედავად იმისა, რომ ვცდილობ, სულ სუფთა იყოს, ჩემი ხელით არასდროს გამირეცხავს. ვერც მანქანის ტექნიკურ დეტალებში ვერკვევი. ერთადერთი, თუ ვხედავ, რომ საბურავმა დაიშვა, პროფილაქტიკაში შევაყენებ და დავამატებინებ. წარმოუდგენლად მიმაჩნია, ავხადო „კაპოტი“ და რაღაცების კეთება დავიწყო. არ არის ეს ჩემი საქმე და ვიცი, არც გამომივა.
ეს მაინც მამაკაცის საქმეა.


- ბევრი ბიჭისგან გამიგია, გოგო მაგარი მანქანის საჭესთან ყურადღებას იპყრობსო. მით უმეტეს, ისეთი ლამაზი, როგორიც შენ ხარ. გვერდიდან მზერები შენც გიგრძნია?
- დამიჯერებთ, რომ გვერდით არასდროს ვიყურები (იცინის)? მართლაც, ასეა. ბევრჯერ ნაცნობსაც უთქვამს, შენ გვერდით ვიდექით შუქნიშანზე და ერთი არ გამოიხედეო. სულ პირდაპირ ვიხედები და ვცდილობ, გვერდიდან კომპლიმენტებს ყურადღება არ მივაქციო.


- დავიჯერო, ერთხელაც არავის მიუქცევია შენი ყურადღება?
- ერთხელ, მახსოვს, ჩემთვის, მობილიზებულად მივდიოდი და გვერდიდან რომ ვერ მიიქცია ჩემი ყურადღება, გამასწრო, ლუქიდან ამოვიდა და რაღაცებს ხელების ქნევით მეუბნებოდა. არაფერი გამოუვიდა, მაინც გულგრილად ჩავუარე (იცინის).


- ამბობ, მობილიზებული დავდივარო, ჰოდა, ახლა გადაგამოწმებ - ჯარიმებს ხშირად იხდი?
- ვცდილობ, წესები არ დავარღვიო, მაგრამ ისეთი მოძრაობაა ქალაქში, ხანდახან გამონაკლისიც ყოფილა და მეც დამირღვევია. პატრულები მცნობენ, კომპლიმენტებს მეუბნებიან და არ მაჩერებენ. სულ ერთხელ დამაჯარიმეს, ისიც არასწორი პარკირების გამო. მიყვარს საჭესთან ჯდომა და არასდროს დამზარებია ვინმეს სახლამდე მიყვანა. არც სახელი დამირქმევია ჩემი მანქანისთვის, მაგრამ იმდენად კაცური და გამძლეა, უფრო ბიჭია და არა გოგო (იცინის). ნებისმიერ ადგილას მიდის, დაყენებაც ადვილია - არ არის ადგილი? ადი ბორდიურზე! (იცინის) - რასაკვირველია, სანამ ამას კანონი აგვიკრძალავს. თავიდანვე თავდაჯერებული დავჯექი საჭესთან და არ მქონია შიში. ეს დიდი პლუსია, რადგან, თუ გეშინია, დაძაბული ხარ, იბნევი და სწრაფადაც ვერ მოქმედებ. ზოგადად, მძღოლებს ვთხოვ, ხშირად დაუთმონ გზა ერთმანეთს - არა აქვს მნიშვნელობა, ქალი ზის საჭესთან თუ მამაკაცი.