- 2018 წელს განსაკუთრებული განწყობით ვხვდები - აპრილის ბოლოს დედა გავხდები! ჩემს პატარას ახლავე ეტყობა, რომ ცელქი იქნება, თუმცა სქესი ჯერ ვერ დავადგინეთ.
- დედობისთვის მზად ხართ?
- თამამად შემიძლია ვთქვა, რომ 29 წლის ასაკში დედობისთვის მზად ვარ. საკუთარ თავზე საერთოდ ვეღარ ვფიქრობ, რადგან ბოლომდე ბავშვზე ვარ გადართული. დედობა ჩემთვის დიდი პასუხისმგებლობა და სიხარულია!
- თავს როგორ გრძნობთ?
- ნორმალური ორსულობა მაქვს და ვცდილობ, აქტიური ცხოვრებით ვიცხოვრო. განსაკუთრებული მოთხოვნებით არ გამოვირჩევი. ჩემი მეუღლეც მეუბნება, ორსულობის პერიოდში ცვლილებას ვერაფერს გატყობ, რადგან ისედაც პრეტენზიული იყავიო. ერთადერთი, რასაც ვგრძნობ, ძალიან სენტიმენტალური გავხდი და ორი კილოგრამი მოვიმატე.
- ფეხმძიმე მეუღლეს ვახო როგორ ანებივრებს?
- ვახოსგან განებივრება არასდროს მაკლდა. ისევ ისეთი ყურადღებიანია, როგორც ორსულობამდე იყო. ძალიან უნდა, გოგოს მამა გახდეს!
- ეს მდგომარეობა თქვენს მუსიკალურ კარიერაზე როგორ მოქმედებს?
- ვეღარ ვმღერი... ბარში, სადაც ვმუშაობდი, ფეხმძიმესთვის შესაბამისი გარემო არ იყო. ალკოჰოლისა და სიგარეტის სუნი, ღამის თევა... ასეთ გარემოში მუშაობას ვეღარ შევძლებდი, რადგან არც ჩემი შვილისთვის იქნებოდა კარგი და გარდა ამისა, მეც ძალიან ადრე მეძინება ხოლმე. სიმღერა ძალიან მენატრება, მაგრამ საკუთარ თავს საყვარელი საქმე მე თვითონ ავუკრძალე. ამ ეტაპზე, შვილის გარდა, არაფერი მაინტერესებს! ერთადერთი, რასაც ფეხმძიმობის პერიოდში მოვახერხებ, ეს ჩემი უსაყვარლესი კომპოზიტორის, დათო ქარჩავას სიმღერების ჩაწერაა. სტუდიაში მუშაობას მაინც გავართმევ თავს.
- პატარა რომ დაიბადება, შემდეგ რა გეგმები გაქვთ?
- სანამ არ წამოიზრდება, სიმღერის გაგრძელებაზე არ ვიფიქრებ, რადგან არ შემიძლია, შვილი სხვას გავაზრდევინო.