- საახალწლო სუფრის სამზადისში თუ ერევით?
- საახალწლო სუფრას ყოველთვის ჩემი მეუღლე, თეა ამზადებს, მეც კარგი კულინარი ვარ, მაგრამ ამის მიუხედავად, სამზარეულოში არც მიშვებს! კაცებს ხშირად გვაბრალებენ, ქვაბს თავის ადგილას არ დგამთ და ხახვის ნაფცქვენსაც მაგიდაზე ტოვებთო.
- გურიაში თუ შეხვედრიხართ ახალ წელს?
- გურიაში ერთხელ შევხვდი ახალ წელს და ძალიან ბედნიერი ვიყავი! მეზობლებისა და ნათესავების ერთმანეთთან გადასვლა, თან თოფით სროლით, კიდევ უფრო სხვა ემოციაა! ფერხაობას დიდ ყურადღებას ვაქცევ. ჩვენი ოჯახის მფერხავი ყოველთვის ჩემი შვილი ანი იყო, თუმცა სიძის, თორნიკე მაისურაძის სახით, უკეთესი მფერხავი შემოგვემატა. მის მეკვლეობას ბევრი კარგი რამ მოჰყვა - შვილიშვილი მამუჩიკო შემოგვემატა, ბევრ წარმატებულ პროექტსაც მოვკიდე ხელი.
- შვილიშვილთან ერთად პირველ ახალ წელს ხვდებით...
- მიმაჩნია, რომ ადრე გამხადეს ბაბუა, თუმცა მამუჩიკომ ჩვენს ოჯახში დიდი ბედნიერება შემოიტანა.
- ახალი წლის ოჯახთან ერთად შეხვედრას რამდენად ახერხებთ?
- გამონაკლისი შემთხვევების გარდა, ახალ წელს ყოველთვის ოჯახთან ერთად ვხვდები და შემდეგ მივდივარ ღონისძიებაზე.
- მამლის წელს როგორ შეაჯამებდით?
- 2017 წელი ჩემთვის ძალიან კარგი აღმოჩნდა. ოჯახში მატებაც გვქონდა და ბიზნესიც კარგად წარიმართა.
- რას ელოდებით ახალი 2018 წლისგან?
- 1978 წლის დეკემბერში, ძაღლის წელში ვარ დაბადებული და ამიტომ ყველაფერს კარგს ველოდები! ჩემს მეუღლესთან ერთად, მოგზაურობაზე ვარ გადართული და ამ წელს ბევრ გასტროლს ვგეგმავ. რაც ანი გათხოვდა, უცხოეთის რომელ ქვეყანაშიც არ უნდა წავიდე, ცოლი ყოველთვის გვერდით მყავს.