მისთვის სახლი ციტადელია და ყველაზე მყარი ადგილი. საცხოვრებლის გამოცვლა სულ ორჯერ მოუწია - ერთხელ გათხოვებისას, მეორედ კი მეუღლესთან ერთად ახლის შეძენისას. ირმა სოხაძე ამბობს, რომ მისი პატარა ბინა ბახტრიონზე მყუდრო, ნათელი და მშვიდია. ბევრჯერ ჰქონდა უკეთესით ჩანაცვლების შანსი, თუმცა ამ სახლში ცხოვრება არჩია. საოცრად უყვარს მშობლების სახლიც, სადაც თითქმის ყოველდღე დადის.
მომღერალს ფუფუნების საგნები არ უყვარს. მისთვის კომფორტს უპირობოდ აუცილებელი, ელემენტარული ნივთები ქმნის. მთავარია, სახლში იყოს სინათლე, სითბო და ჯანსაღი საკვები.
ასაკთან ერთად, კვების რაციონი საკმაოდ შეამცირა. მისი სილამაზის საიდუმლოც სწორედ ესაა. მას შემდეგ, რაც, ძირითადად, რძის პროდუქტებსა და ბოსტნეულს მოიხმარს, თავს გაცილებით უკეთესად გრძნობს. ირმა ამბობს, რომ, როცა 15 წლის წინანდელ ფოტოებს უყურებს, თავს დაღლილად და მოწყენილად ხედავს. უკონტროლო ჭამის რეჟიმი და ხორცეული საერთოდ დაივიწყა, თავი დაანება მოწევასაც. ამიტომ ახლა გაცილებით მეტი ენერგია და ძალა აქვს. ყველაზე მეტად კი რძიანი ყავა უყვარს.
მის სიმღერებს ბავშვები და მოზარდები დღემდე მღერიან. ამის მიზეზი არ იცის და ამბობს, რომ წარმატებას თავისი დაუწერელი კანონები აქვს, ის ბევრ რამეზეა დამოკიდებული. ირმა სოხაძის „ნარინჯისფერი სიმღერა“ უკვე 50 წელია, პოსტსაბჭოთა სივრცეში ყველას ახსოვს და უყვარს. 
