აქ ახლა ღვინის სალონია, ერთი თვის წინათ კი ამ ადგილას დათო ხუჯაძის სახლის ერთი უბრალო, ცარიელი ოთახი იყო, რომელშიც წლების განმავლობაში არავინ შედიოდა. საბოლოოდ სახლის მეპატრონემ ეს ფართი ღვინის სადეგუსტაციო სალონად აქცია, რადგან ამ ადგილას უამრავი ტურისტი დადის. ამბობს, რომ ხელი ბიზნესს მიჰყო, თუმცა ეს მის პროფესიას ზიანს ვერ მიაყენებს.
ამ სალონში კერძებს ვერ შემოგთავაზებენ, აქ მხოლოდ ღვინის ნაირსახეობების დაგემოვნებას შეძლებთ. „გასაგებია, რომ ჩვენი კულტურა სხვა რაღაცას მოიცავს - უნდა დალიო ყანწებით, მაგრამ ასეც საკმაოდ კარგად შეგიძლია, მიიღო ბახუსი და მეორე დღეს ჯანსაღადაც გაიღვიძო. მე ბევრ ქვეყანაში ვარ ნამყოფი და ასეთი სალონი ბევრი მინახავს. მოვინდომე, მსგავსი რაღაც საქართველოშიც გამეკეთებინა“, - გვიყვება მომღერალი.
თავად ხალხში ხშირად გასვლა და ჟრიამული არ უყვარს. დალევასაც კი რამდენიმე ადამიანთან ერთად, ვიწრო წრეში, მშვიდ ადგილას ამჯობინებს. ეს სალონიც სწორედ ამისთვის შეიქმნა - 7-8 მეგობარზე გათვლილი მყუდრო გარემო, სადაც „შენს გემოზე შეგიძლია საუბარი და დასვენება“.
დათოსთან სტუმრად მისულები აუცილებლად შეამჩნევთ გიტარას, რომელიც ყველასთვის ხელმისაწვდომი ნამდვილად არ არის. „გიტარა იმ სტუმრებისთვისაა, ვისაც ვენდობი, რომ ხელში მივცე. საკმაოდ ძვირად ღირებულია და ყველას არ აქვს უფლება, ხელში აიღოს. თუ იცის ადამიანმა დაკვრა, ისიც უნდა იცოდეს, როგორ მოეპყრას და მოუაროს“, - გვიყვება მომღერალი.
დათო ხუჯაძე, როგორც აღმოჩნდა, ძალიან ეჩვევა ხოლმე ნივთებს, თუმცა მხოლოდ რაღაც პერიოდით. შეიძლება, სულ ეკეთოს ერთი საათი ან სამაჯური, ბეჭედი. მერე უნდა შეცვალოს. აი, რაც შეეხება ავტომობილს, ის ერთი ჰყავს და ამბობს, რომ არასდროს შეელევა.
