ნუცა ჯანელიძესთან სახლში ყოველთვის ხალხმრავლობაა. 
თავად მუსიკოსი სახლში მთელ დღეს, ძირითადად, შაბათ-კვირას ატარებს ხოლმე, როცა მოწაფეებს ამეცადინებს. დღესასწაულებისა და მნიშვნელოვანი თარიღების აღნიშვნა, სახლზე მეტად, გარეთ ურჩევნია. სუფრის გაწყობაზე მეტად, ალაგება უყვარს, კერძების კეთებაც ეხერხება, თუმცა იშვიათად უწევს. რაც შეეხება სახლის საქმეს, ნუცას ჭურჭლის რეცხვა და უთოობა არასდროს ეზარება.
ნუცას სახლში ბევრი მცენარეა. ამბობს, რომ ეს მისი ძმისა და რძლის დამსახურებაა. თავად ძალიან უყვარს მცენარეებზე ზრუნვა და კარგადაც უვლის. მათი აყვავილება კი ყველაზე მეტად სიამოვნებს ხოლმე.
ამბობს, რომ თავისი სახლი ყველა სეზონზე უყვარს, თუმცა ზაფხულობით - განსაკუთრებით. ამ დროს მისი ოთახის აივანზე ბევრი მზე, სითბო და სუფთა ჰაერია. ზამთრის მოსვლაც უხარია - იმიტომ, რომ ზაფხული მალე მოვა.
