სტუმრები ამ სივრცეს სულ მალე ესტუმრებიან და ჟანრი ლოლაშვილის ილუზორულ სამყაროში იმოგზაურებენ.
„მაქვს მკერდს მიდებული ქნარი როგორც მინდა“ - გალაკტიონის ეს სიტყვები ჟანრი ლოლაშვილის ამჟამინდელ მდგომარეობას ზუსტად გამოხატავს. ამბობს, რომ ხელოვნების ამ სამყაროში თავადაა რეჟისორი, მსახიობი და პირველი შემფასებელიც.
„საერთოდ, ადამიანს აქვს მიდრეკილება ილუზიებისკენ. ღმერთმა ადამიანის ფსიქიკაში ჩადო ფანტასტიკური ფენომენი - სიზმარი, რომელიც მთლიანად ადამიანის ცხოვრების, მისი შემოქმედების განუყოფელი ნაწილია. რეალური და ირეალური სამყარო, რაციონალური და ირაციონალური - ამ ორ გაგებასთან გვაქვს საქმე. კიდევ განსაკუთრებული რამ არის თვითონ ხელოვნებაში არსებობა, ეს არის ილუზორულ სამყაროში ყოფნა. რაღაც ვისწავლე, ბევრი რამ შევიძინე, ღირებულებებზე ვფიქრობ, არსებობს სევდა იმ ადამიანებზე, ვინც წავიდნენ ამ ქვეყნიდან, ბევრი რამ შეიცვალა. ახლა ის პერიოდია როცა მივიჩნევ, რომ ვიპოვე, ის რაც მე მინდა“, - გვიყვება ჟანრი ლოლაშვილი საკუთარი მხატვრობის აღწერისას.
ამბობს, რომ მხატვრობაში არის განსაკუთრებული ლაბირინთები, დერეფნები, შიდა გასვლები. უნდა იცოდე ფერი, გქონდეს გადმოცემის შესაძლებლობები, ილუზიები, შექმნის განსაკუთრებული სურვილი, დაფიქსირებული ცოდნა, რა რის შემდეგ უდნა გააკეთო. „რატომ სჭირდება ეს ადამიანს ხშირ შემთხვევაში? რეალური, ნატურალური რამ არ მუშაობს ადამიანის ფსიქიკაზე ისე, როგორც საჭიროა, არ აღიქმება, ამიტომ ირეალური და გამძაფრებული აუცილებელია. იმას, რაც წმინდად რეალისტურია, აქვს უფლება, არ იმოქმედოს. ხელოვნებას სჭირდება რაღაცის გამძაფრება, უტრირება…“ - ამბობს ჟანრი ლოლაშვილი.
„შენი სამყარო არის ის, რაც განიცადე, რაც დარჩა და რაც ასე ადვილად არ გარბის შენგან, არ ქრება უკვალოდ. თავისუფლება, რასაც იწვევს ხელოვნება, ამ შემთხვევაში - მხატვრობა, განსაკუთრებულია, არის ასევე ძალიან ბევრი ჭიდილი მოვლენებთან, რთული არჩევანი… ამ ძიებებს მიჰყავს ადამიანი სიმართლისკენ და რჩება ორი სამყარო: რაციონალური და ირაციონალური. ირაციონალური იმდენად საინტერესოა, რამდენადაც თავის თავში რაციონალურსაც მოიცავს. ამდენად, ორმაგი ხდება ეს ყველაფერი. ჩემი ნააზრევი ბევრ საკითხზე ილუზორულია, მე იქითკენ მივრბივარ, სადაც ილუზიების სამყაროა. ის მირჩევნია იმიტომ, რომ სიმართლისგან შორს არის, იქ ისეთი რამ ხდება, რასაც კონსტიტუცია ვერ დაგიწერს“, - ასეთია ჟანრი ლოლაშვილის სხვა სამყარო.