შელდონი ბოსტონის მახლობლად, ღარიბი ებრაელი ტაქსის მძღოლის ოჯახში დაიბადა. დედა წარმოშობით უკრაინიდან იყო, მამა - ლიტვიდან. მომავალმა მილიარდერმა თავისი პირველი ფული 12 წლის ასაკში, გაზეთების გაყიდვით გამოიმუშავა. იმ დროს ბიზნესის სფერო უკვე აინტერესებდა და მოგვიანებით, სესხების საკითხში მაკლერი და ინვესტიციის სფეროში მრჩეველი გახდა.
ბიზნესმენმა, რომელსაც უმაღლესი განათლება არასოდეს მიუღია, მოახერხა, ემუშავა იპოთეკურ ბროკერად, საინვესტიციო ექსპერტად, ფინანსურ კონსულტანტად და 50 სხვადასხვა კომპანია შეექმნა.
70-იან წლებში ადელსონმა ლას-ვეგასში კონფერენციებისა და გამოფენების ორგანიზება დაიწყო.
1991 წელს ის, მეუღლესთან ერთად, ვენეციაში საქორწინო მოგზაურობაში იმყოფებოდა. სწორედ მაშინ გაუჩნდა ლას-ვეგასში ვენეციური არხებითა და ნაგებობებით აღჭურვილი, თანამედროვე კაზინოებისა და სასტუმროების ქსელის შექმნის იდეა.
მოგვიანებით, შელდონ ადელსონმა და მისმა პარტნიორებმა ლას-ვეგასის ლეგენდარული კაზინო The Sands Hotel & Casino შეიძინეს, რომელსაც ფრენკ სინატრა ხშირად სტუმრობდა.
მომდევნო წელს ებრაელმა მილიარდერმა ახალი საგამოფენო დარბაზი The Sands Expo Convention Center ააშენა, რომელმაც აშშ-ის საგამოფენო ინდუსტრიაში ლას-ვეგასის პოზიციები გაამყარა. ადელსონმა, ფაქტობრივად, ლას-ვეგასის სასტუმროების ინდუსტრიაში რევოლუცია მოახდინა და ქალაქს გასართობი და სათამაშო სფეროების ორიენტირებისკენ უბიძგა.
2004 წელს ადელსონის მიერ „Las Vegas Sand“-ის აქციების შეძენის შემდეგ, კორპორაციის მოღვაწეობა მნიშვნელოვნად გაფართოვდა.
2004 წელს ებრაელმა მილიარდერმა მაკაოში მდებარე კაზინო „Sands“-ის მშენებლობაში 265 მილიონი დოლარი ჩადო და ქალაქის ადმინისტრაციასთან შეთანხმება გააფორმა, რომლის თანახმად, კაზინოების კომპლექსის, სასტუმროების, საგამოფენო ცენტრებისა და მაღაზიების მშენებლობაში 12 მლრდ დოლარი დააბანდა.
ადელსონის წყალობით, კაზინოების აზიური დედაქალაქი მაკაო მსოფლიო სათამაშო ბიზნესის ერთ-ერთ ცენტრად იქცა. მას შემდეგ ადელსონს კაზინოებსა და სასტუმროებში ინვესტიციების ჩადება არ შეუწყვიტია და მისი სახელი ძირითადად სათამაშო ბიზნესთან ასოცირდება.
ბიზნესსაქმიანობის პარალელურად, ადელსონი აქტიურ საქველმოქმედო საქმიანობას ეწევა.
2006 და 2007 წლებში მან 50 მლნ დოლარი სიონისტურ ორგანიზაცია Birthright Israel-ში გადარიცხა, რომელიც ებრაელი ახალგაზრდების ისრაელში დაბრუნებას აფინანსებს.
შერონ ადელსონი 1991 წელს ექიმ მირიამ ოქსჰორნზე დაქორწინდა. წყვილს ხუთი შვილი ჰყავს.