გრიგოლ ყიფშიძე: ნამდვილად არ მეგონა, თუ ჟიურიში ასეთ ემოციებს გამოვიწვევდი. 4 სკამის ტურს რომ გადავლახავდი, ამის მოლოდინი მქონდა, მაგრამ ორი სკამის ტურის ცოტა მეშინოდა, რადგან ასეთ ძლიერ კონკურსანტებში ჩემი მენტორისთვის გიორგი გაბუნიასთვის გადაწყვეტილების მიღება რთული იყო. საბოლოოდ, ძალიან გამიხარდა, რომ გიორგიმ ორ კონკურსანტს შორის ამარჩია.
- შენი გამარჯვების შანსი გაიზარდა...
- ჩემი გამარჯვება ხალხზეა დამოკიდებული. სიმართლე გითხრათ, ჩემთვის მთავარი ხალხის სიყვარულია და არა ის, გავიმარჯვებ თუ არა. ჩემი მენტორი გიორგი გაბუნია ჩემზე დიდ იმედებს ამყარებს. მთავარია, გავამართლო. ბედნიერი ვარ, რომ მშობლები ჩემით ამაყობენ. სკოლაშიც დიდი ხელშეწყობა მაქვს.
- „X ფაქტორმა“ შეცვალა შენი ცხოვრება?
- დიახ... პოპულარული გავხდი, ხალხს ვუყვარვარ და გარეთ რომ გავდივარ, მეფერებიან, კომპლიმენტებს მეუბნებიან.
- მშობლებმა რა როლი ითამაშეს შენს მუსიკალურ განვითარებაში?
- მამაჩემი, პაატა ყიფშიძე მუსიკოსია, მღერის. დედა პროფესიით უცხო ენების სპეციალისტია, მაგრამ ისიც მომღერალია. მშობლებთან ერთად ხშირად ვმღერი, თუმცა ვერ გეტყვით, რომ სიმღერა რომელიმე მათგანმა მასწავლა. ბავშვობიდან კარგი მსმენელი ვარ და ყველაფერს დამოუკიდებლად ვსწავლობ.
- სიმღერის გარდა, რა გატაცებები გაქვს?
- გიტარასა და პიანინოზე ვუკრავ. ვთამაშობ ჭადრაკს და მიყვარს ფეხბურთი.
