მამულიჩა: „გაბუნია პროექტიდან ძლიერ კონკურსანტებს სპეციალურად უშვებს“
მამულიჩა (კახი მამულაშვილი): პროექტში ასეთი დაძაბულობა ძალიან მომწონს. შოუ მაშინ არის საინტერესო, როცა სიტუაცია იძაბება. მეორე ლაივზეც სანერვიულო მქონდა, რადგან აუტსაიდერებში ისევ ლელას გოგო მოხვდა. მინდა, გითხრათ, რომ მსგავსი ტიპის შოუებში გოგონებს უფრო ნაკლები მხარდაჭერა აქვთ ხოლმე. ახლა კი, როგორც გამოჩნდა, ბავშვების მენტორებიც არანაკლებად აქტიურობენ. გაბუნიასი არაფერი დაიჯეროთ! პროექტიდან სპეციალურად ძლიერ კონკურსანტებს უშვებს, რათა ყოველ მომდევნო ტურში გაძლიერდეს.
გიორგი გაბუნია: მამულიჩას მეუღლეს ორი კონკურსანტი ვინ შეუნარჩუნა? მადლობას უნდა მიხდიდეს, რომ წინა ლაივ-კონცერტზე საჟინიანს მივეცი ხმა, მეორეზე კი ვასაძეს დავუჭირე მხარი. შენ და ლელამ სანთლები აანთეთ ჩემს სახელზე, ხალხს კი მოვუწოდებ, რომ ჩემს კონკურსანტებს დაუმესიჯონ!
პროექტი მაყურებელს სიახლეებით რომ ანებივრებს, ეს ყოველ სეზონსა თუ გადაცემაში ჩანს. ბახვა ბრეგვაძე პირველ ლაივ-კონცერტზე ლიკა ქორქიასთან ერთად გულშემატკივრების ოთახში გამოჩნდა. გუშინ კი ახალ, ე.წ. სელებრითების ოთახში ცნობილ ადამიანებს მასპინძლობდა და კონკურსანტების შესახებ ესაუბრებოდა.
ბახვა ბრეგვაძე: ჩცდ-დან „X ფაქტორში“ გადმოვინაცვლე, თუმცა იქაც ყველაფერი არ დასრულებულა. თითქოს მე და კამერას ერთმანეთი გვიყვარს, მაგრამ პირველ ლაივ-კონცერტზე ისე ვინერვიულე, თუ გადავრჩებოდი, არ მეგონა. ალბათ, იმიტომ, რომ მეგაშოუში ყველაფერი ისეა აწყობილი, კადრში უბრალოდაც რომ მოხვდე, დიდი პასუხისმგებლობა გეკისრება. მეორე ლაივ-კონცერტზე კიდევ უფრო ახალი ამპლუის მორგება მომიწია. ლიკა გულშემატკივრების ოთახში დარჩა. მე კი გადმოვინაცვლე ოთახში, სადაც ცნობილ ადამიანებს, „X ფაქტორის“ გულშემატკივრებს გავესაუბრები.
მეორე ლაივ-კონცერტის დროს კულისებში მომღერალ ოთო ნემსაძეს შევხვდით.
ოთო ნემსაძე: ასეთი ძლიერი სეზონი იშვიათია და ეს ყველაფერი „რუსთავი 2“-ის დამსახურებაა. ჩემი კარიერის დაწყებაც ამ ტელეკომპანიის პროექტს უკავშირდება - 2010 წელს „ჯეოსტარი“ მოვიგე. წლევანდელ „X ფაქტორში“ გრიგოლ ყიფშიძეს ვგულშემატკივრობ. ძალიან მაგარი ბავშვია! მეც და ჩემი ოჯახიც ვუმესიჯებთ. მინდა, რომ ძალიან წარმატებული იყოს, რადგან მსოფლიო დონის მუსიკოსი გვეზრდება.