სოფო საჟინიანი: პროექტის დატოვებას არ ველოდი, მაგრამ ისეთი ადამიანი ვარ, ყველაფერს ღირსეულად ვხვდები. ჩემთვის მთავარი ამ ეტაპამდე ღირსეულად მოსვლა იყო. რაც ყველაზე მნიშვნელოვანია, ხალხი სოფო საჟინიანს იცნობს, როგორც მაგარ მომღერალს. თავს დაჩაგრულად და გაგდებულად არ მივიჩნევ. მინდა, კონკურსანტებს წარმატება ვუსურვო. ვინც არ უნდა გაიმარჯვოს, ყველა ღირსეულია. თამარ ედილაშვილი ძალიან მაგარი გოგოა და ჟიურიმ პროექტში რომ დატოვა, სწორი გადაწყვეტილება მიიღო.
- რა გეგმები გაქვთ?
- კონკურსანტები შაბლონური ტექსტებით გამოვდივართ და პროექტის დატოვების შემდეგ ვამბობთ, რომ გაჩერებას არ ვაპირებთ, მაგრამ მე რეალურად ასე ვფიქრობ. სიმღერა იმდენად ჩემია, მინდა ჩემი რაღაც შევქმნა. იქნებ სტეფანეს მერე აღარ ჰქონდეს პრობლემა იმისა, რომ სიმღერებში ჩემს ინდივიდუალიზმს არ ვაჩენ. ჩემს სიმღერას მას პირველს გავუგზავნი და დავუმტკიცებ, რომ ცდება.
- სტეფანეს შეფასებამ გაგაღიზიანათ?
- უბრალოდ, უსაფუძვლოდ არაფერზე შეიძლება კომენტარის გაკეთება. ყველა შესრულებაში ვხვდები ჩემს ინდივიდუალიზმს. ბიორკის სიმღერას რომ ვასრულებდი, სულ ვკანკალებდი. მისი სიმღერის გადაკეთება შეუძლებელია. შევასრულე ისე, როგორც საჭირო იყო და საკუთარ თავზეც გავიმარჯვე.