- რა არის თქვენთვის სრულყოფილი ბედნიერება?
- აი, ჩემს შვილს რომ ჩავეხუტები, ეს არის ჩემთვის სრულყოფილი ბედნიერება.
- ბოლოს როდის გაიცინეთ?
- ბოლოს აქ მოსვლამდე გავიცინე, კარგ ანეკდოტს მომიყვნენ გურულებზე, სხვათა შორის.
- ბოლოს როდის იტირეთ?
- სენსიტიური თემაა... როცა შვილი დავკარგე.
- თქვენი ხასიათის მთავარი შტრიხი?
- ძალიან სწრაფი ვარ.
- ყველაზე დიდი ნაკლი?
- აფექტური ვარ, რაც ძალიან არ მომწონს, რადგან ხშირად იმ დროს გამოვდივარ წყობიდან, როცა შემიძლია, სიმშვიდე შევინარჩუნო.
- ყველაზე მეტად რომელ ისტორიულ ფიგურასთან აიგივებთ თავს?
- არასოდეს გამიიგივებია თავი არცერთ ისტორიულ ფიგურასთან. მიმაჩნია, რომ ყველა პიროვნება ინდივიდუალურია.
- ვინ არიან თქვენი გმირები დღეს?
- ადამიანები, რომლებიც უანგაროდ აკეთებენ სიკეთეს.
- თქვენი მხატვრული გმირები?
- ნოდარ დუმბაძის ზურიკელა და სოსოია - ორივე ძალიან მიყვარს.
- ყველაზე შთამბეჭდავი მოგზაურობა?
- მეუღლესა და შვილთან ერთად შრი-ლანკაზე მოგზაურობა, რომელიც არასდროს დაგვავიწყდება.
- თვისება, რომელსაც უპირატესობას ანიჭებთ მამაკაცში?
- ქალის პატივისცემა.
- ქალში?
- ერუდიცია, განათლება.
- საყვარელი მწერლები?
- მიხეილ ბულგაკოვი; ჭაბუა ამირეჯიბი.
- საყვარელი კომპოზიტორი?
- ფრიდერიკ შოპენი.
- ფილმი?
- ბევრი ფილმი მიყვარს და ვერ ვიტყვი, რომ რომელიმეს გამოვარჩევ. უფრო დოკუმენტური ფილმები მიზიდავს, ვიდრე მხატვრული.
- რას მიიჩნევთ თქვენს ყველაზე დიდ მიღწევად?
- ჩემი ყველაზე დიდი მიღწევაა ის, რომ 15 წლიდან ვმუშაობ და აქამდე, პრაქტიკულად, დამოუკიდებლად, ჩემით მოვედი.
- რა არის თქვენთვის ყველაზე ძვირფასი?
- ჩემი ოჯახი.
- თარიღი, რომელსაც თქვენი ცხოვრებიდან გამოტოვებდით?
- სამყაროს რეალურად აღვიქვამ და ვხვდები, რომ ეს შეუძლებელია. ალბათ, ბავშვობაში თუ მიფიქრია რაღაცის შეცვლაზე და რომელიმე თარიღის გამოტოვებაზე, მას შემდეგ - აღარ.
- რა არის თქვენთვის სამშობლო?
- სამშობლოსა და სიყვარულის განმარტება ერთ კონტექსტშია ჩემთვის, რასაც სიტყვებით მართლა ვერასდროს გადმოვცემ. ეს, უბრალოდ, შეუძლებელია.
- რისი გეშინიათ ყველაზე მეტად?
- იმის, რისიც ყველა მშობელს ეშინია დედამიწაზე...
- როგორ ისურვებდით სიკვდილს?
- ყველაზე კარგი სიკვდილი, ალბათ, ის არის, როდესაც ძილში გახვალ ამ ცხოვრებიდან, თუმცა ადამიანი ტკივილით მოდის ქვეყანაზე და ასევე, ტკივილით უნდა წავიდეს.
- თუკი ოდესმე ღმერთს შეხვდებოდით, რას ისურვებდით, რომ თქვენთვის ეთქვა?
- ალბათ, იმას, რომ სწორად ვიცხოვრე.