უღალატობა

- რა არის თქვენთვის სრულყოფილი ბედნიერება?
- სრულყოფილი ბედნიერება, ალბათ, არ არსებობს. „ერთი ბავშვის ცრემლი დაარღვევდა მსოფლიო ჰარმონიას“.  ბავშვის ცრემლი კი სულ არის. ამდენად, სრულყოფილება ძნელია.

- ბოლოს როდის გაიცინეთ?
- ამ წუთშიც... გამიხარდა თქვენი დანახვა და გავიცინე.

- ბოლოს როდის იტირეთ?
- როდესაც ჩემი ქმარი გარდაიცვალა.

- თქვენი ხასიათის მთავარი შტრიხი...
- ზედმეტი ემოციურობა.

- ყველაზე დიდი ნაკლი...
- ჩემი ფეთქებადი ბუნება.

- ყველაზე მეტად რომელ ისტორიულ ფიგურასთან აიგივებთ თავს?
- ვერავისთან. ბუნებით თანამედროვე ადამიანი ვარ და ისტორიულ დროში ვერ ვიცხოვრებდი.

- ვინ არიან თქვენი გმირები დღეს?
- პირად ცხოვრებაში - უღალატო ადამიანები და საზოგადოებრივ ცხოვრებაში - ნონკომფრომისტები.

- თქვენი მხატვრული გმირები
- გალაკტიონი და ბარათაშვილი - ორივე გაფრინდა ცხენით და შეეწება ცას. ჩემთვის ისინი მხატვრული გმირები არიან.

- ყველაზე შთამბეჭდავი მოგზაურობა...
- პარიზი, სადაც ყველაზე ხშირად ვმოგზაურობდით.

- თვისება, რომელსაც უპირატესობას ანიჭებთ მამაკაცში...
- უღალატობა და მამაკაცურობა, როდესაც მის გვერდით გრძნობ, რომ ქალი ხარ.

- ქალში?
 - ქალშიც უღალატობა.

- საყვარელი მწერლები...
- გალაკტიონი, ფოლკნერი, ცვეტაევა.

- საყვარელი კომპოზიტორი...
- ბეთჰოვენი, შოპენი და სტრავინსკი.

- ფილმი?
- ფელინის ფილმები. უფრო - „რვანახევარი“.

- რას მიიჩნევთ თქვენს ყველაზე დიდ მიღწევად?
- იმას, რომ შემიძლია წერა დღემდე და ვოცნებობ, შემეძლოს სიკვდილამდე.

- რა არის თქვენთვის ყველაზე ძვირფასი?
- ჩემი ქმრის ხსოვნა, ჩემი შვილი, შვილიშვილი და ჩემი შემოქმედება.

- რას აკეთებთ მაშინ, როცა არ წერთ?
- ვფიქრობ, როდის დავწერ.

- რისი გეშინიათ ყველაზე მეტად?
- სტიქიური უბედურების ანუ ომის.

- როგორ ისურვებდით სიკვდილს?
- ძილში ან სცენაზე, როცა ლექსს ვკითხულობ.

- თუკი ოდესმე შეხვდებოდით ღმერთს, რას ისურვებდით, რომ თქვენთვის ეთქვა?
- რომ არცთუ ისეთი ცოდვილი ვარ.