- რა არის თქვენთვის სრულყოფილი ბედნიერება?
- მგონია, რომ სრულყოფილი ბედნიერება არ არსებობს. ჩემთვის ეს არის კონკრეტული დღეები და კონკრეტული წამები.
- ბოლოს როდის გაიცინეთ?
- ხშირად ვიცინი. აი, ახლაც გამეცინა...
- ბოლოს როდის იტირეთ?
- იშვიათად ვტირი. უფრო, განსაკუთრებული ტკივილის დროს. ბოლოს ახლობელი ადამიანის დაკარგვისას ვიტირე.
- თქვენი ხასიათის მთავარი შტრიხი?
- გაორება.
- ყველაზე დიდი ნაკლი?
- ბევრი ნაკლი მაქვს, მაგრამ ყველაზე მეტად სიზარმაცე მიშლის ხელს.
- ყველაზე მეტად რომელ ისტორიულ ფიგურასთან აიგივებთ თავს?
- გაიგივებით, ალბათ, არავისთან, მაგრამ მომწონს ნაპოლეონი და უინსტონ ჩერჩილი. მათთან სიამოვნებით გავაიგივებდი თავს.
- ვინ არიან თქვენი გმირები დღეს?
- ჩვენი ჯარისკაცები.
- თქვენი მხატვრული გმირები?
- ტომ სოიერი და დარტანიანი.
- ყველაზე შთამბეჭდავი მოგზაურობა?
- ყველაზე კარგად მახსოვს, როდესაც მამამ პირველად იტალიაში - რომსა და ფლორენციაში წამიყვანა.
- თვისება, რომელსაც უპირატესობას ანიჭებთ მამაკაცში?
- ჭკუა.
- ქალში?
- ჭკუა და ერთგულება.
- საყვარელი მწერლები?
- ვაჟა ფშაველა, თომას მანი, ერნსტ ჰემინგუეი, რიუნოსკე აკუტაგავა, ჯორჯ ორუელი, ხალედ ჰოსეინი.
- საყვარელი კომპოზიტორი?
- გუსტავ მალერი და ლუდვიგ ვან ბეთჰოვენი.
- ფილმი?
- „მექანიკური ფორთოხალი“, „ამარკორდი“, „მთელი ეს ჯაზი“, „ბლოუ-აფი“.
- რას მიიჩნევთ თქვენს ყველაზე დიდ მიღწევად?
- ჩემი ყველაზე დიდი მიღწევა აუცილებლად წინ მაქვს.
- რა არის თქვენთვის ყველაზე ძვირფასი?
- ადამიანები.
- თარიღი, რომელსაც თქვენი ცხოვრებიდან გამოტოვებდით?
- ახლობელი ადამიანის გარდაცვალების თარიღს.
- რა არის თქვენთვის სამშობლო?
- სამშობლო არის გულისცემა. გენეტიკური მეხსიერება, რომელიც ყველგან თან დაგყვება, სადაც არ უნდა იყო.
- რისი გეშინიათ ყველაზე მეტად?
- ახლობელი ადამიანების სიკვდილის.
- როგორ ისურვებდით სიკვდილს?
- უმტკივნეულოდ.
- თუკი ოდესმე შეხვდებოდით ღმერთს, რას ისურვებდით, რომ თქვენთვის ეთქვა?
- WELCOME.
ფოტოგრაფი: ალექსანდრე სხულუხია