Daily mail-ის ინფორმაციით, ბრიტანელმა მეცნიერებმა აღმოაჩინეს, რომ წითელი ღვინო და შოკოლადი კანის დაბერებული უჯრედების გაახალგაზრდავებას ეხმარება.
დაბერების პროცესის დროს, დნმ ჯაჭვები ჩვენს უჯრედებში თანდათან კარგავენ დამცავ ტელომერებს (ადამიანის გენეტიკური მასალის მცირე ფრაგმენტები, რომლებიც პასუხისმგებელი არიან დაბარების პროცესზე) ამ პროცესთან საბრძოლველად, მეცნიერთა ჯგუფმა გამოიყენა ფლავონოიდები, რომლებიც წითელ ღვინოში, შავ შოკოლადსა და მოცვში უხვად მოიპოვება და ანთების საწინააღმდეგო ეფექტითაა ცნობილი.
ფლავონოიდებით ჩატარებული მკურნალობიდან რამდენიმე საათში ძველმა უჯრედებმა თანდათან ტელომერების აღდგენა დაიწყეს და გაჩნდა იმედი, რომ ეს აღმოჩენა მეცნიერებს დაბერების საწინააღმდეგო თერაპიის შექმნაში დაეხმარება.
ღვინო სასიკეთო გავლენას მხოლოდ კანზე არ ახდენს. ის, ასევე, ამცირებს ნაადრევი სიკვდილისა და გულ-სისხლძარღვთა დაავადებების რისკს.
ალკოჰოლის ზომიერი მოხმარება (კვირაში 7 ჭიქამდე ქალებისთვის, ხოლო 14 ჭიქამდე მამაკაცებისთვის) მნიშვნელოვნად ამცირებს გულ-სისხლძარღვთა დაავადებებისგან გამოწვეული სიკვდილის რისკს.
დიდი ბრიტანეთის ეგზეტერის უნივერსიტეტის მკვლევარებმა, ბრაიტონის უნივერსიტეტის მეცნიერებთან ერთად, დაასკვნეს, რომ გენების კლასი, რომელსაც სპლაისინგური ფაქტორი ეწოდება, დაბერებასთან ერთად, „ითიშება“.
„ეს ხანდაზმული ადამიანების უჯრედების აღდგენის პირველი მცდელობაა. ჩვენი მონაცემები ადასტურებს, რომ ზემოხსენებული ქიმიური ნივთიერებების გამოყენებამ გენების „გადატვირთვისას“ შეიძლება კანის დაბერებული უჯრედები აღადგინოს“, - განაცხადა პროფესორმა ჰარისმა.
ეგზეტერის უნივერსიტეტის მეცნიერი, დოქტორი ევა ლაროტი აღფრთოვანებულია ხანდაზმული ადამიანების კანის უჯრედებში მიმდინარე პროცესით:
„როცა დავინახე, როგორ მიმდინარეობდა უჯრედებში გაახალგაზრდავების პროცესი, თვალებს ვერ დავუჯერე. ექსპერიმენტი რამდენჯერმე გავიმეორე და ყოველთვის ერთ და იგივე შედეგი მივიღე - გაახალგაზრდავება. ეს ნამდვილი ჯადოქრობაა“.