შოკოლადის „ესკიმო“ ბანანის არომატით

შემადგენლობა ბისკვიტისთვის:
5 კვერცხი
320 გრამი შაქარი
320 გრამი ფქვილი
2 სუფრის კოვზი კაკაო
1 ჩაის კოვზი სოდა
ჩაის კოვზის წვერით სუფთა ვანილი (კრისტალები).

შემადგენლობა კრემისთვის:
1 ჭიქა ნაღების ფხვნილი
50 გრამი კარაქი
ნახევარი ქილა შედედებული რძე (სგუშონი)
2 სუფრის კოვზი ბანანის ჟელე
1 სუფრის კოვზი ჟელატინი.

შემადგენლობა ტორტზე მოსასხმელი მინანქრისთვის:
1 ფილა შოკოლადი
2 სუფრის კოვზი ზეთი

ბისკვიტის ცომის მომზადება:
საშუალო ზომის ჯამში ჩაახალეთ კვერცხები, დააყარეთ შაქარი, ვანილი და დაიწყეთ თქვეფა. ეს პროცესი, დაახლოებით, 15 წუთს მოიცავს, სანამ გოგლიმოგლი კარგად არ ამოვა. თქვეფის დასრულებამდე 2 წუთით ადრე დაამატეთ სოდა და მიქსერი გააჩერეთ.
კაკაო და ფქვილი ცალ-ცალკე, პატარა საცერით ჩაცერით ცომში, თან ხის კოვზით ფრთხილად ურიეთ.
გამზადებული ცომი დაასხით ცხიმწასმულ, ოთხკუთხედ „ჟარონაზე“ და 200 გრადუსზე გახურებულ აერღუმელში შედგით.

კრემის მომზადების წესი:
1 ჭიქა ნაღების ფხვნილს დაამატეთ 1 ჭიქა მაცივარში გაციებული წყალი და მიქსერით ამოიყვანეთ.
ცალკე ათქვიფეთ კარაქი და ნელ-ნელა შეათქვიფეთ  ნახევარი ქილა შედედებული რძე.
დაამატეთ 2 სუფრის კოვზი ბანანის ჟელე (იყიდება საკონდიტრო განყოფილებებში) და 2 სუფრის კოვზი გამზადებული, ცხელი ჟელატინი.

ჟელატინის მომზადების წესი:
1 სუფრის კოვზ ჟელატინის გრანულებს დაასხით ნახევარი ჭიქა წყალი და  ორი საათით გააჩერეთ.
თუ ჟელატინი არა გრანულების, არამედ ფხვნილის სახითაა, დალბობას გაცილებით ნაკლები დრო (დაახლოებით, ნახევარი საათი) დასჭირდება. დალბობილი ჟელატინი დადგით ძალიან დაბალ ცეცხლზე და ადუღებამდე როცა მივა, გამორთეთ.

ტორტის მომზადება:
გამომცხვარი და გაციებული ბისკვიტი გაჭერით შუაზე და დანამეთ 1 ჭიქა წყლის, 1 ჭიქა შაქრის, 1 სუფრის კოვზი კონიაკის და ცოტა ვანილისგან მომზადებული სიროფით (სიროფი ადუღებამდე უნდა მიიყვანოთ და გააციოთ).
დანამული ბისკვიტის ერთ ნაჭერზე წაუსვით გამზადებული კრემი და ზედ დაადეთ მეორე დანამული ნაჭერი.
ტორტს გარშემო, გვერდებზე წაუსვით კრემი და მოაყარეთ ქოქოსის ფანტელი, კაკაო  ან თავისივე გვერდების ჩამონაჭრების ნაფხვენები. გამზადებულ ტორტს თავზე მოასხით შოკოლადის მინანქარი.

შოკოლადის მინანქარის მომზადების წესი:
1 ფილა სუფთა შოკოლადი დატეხეთ, ჯამში ჩაყარეთ და დაამატეთ 1 ან 2 სუფრის კოვზი ზეთი.
ჯამი დადგით ორთქლის აბაზანაზე.
როგორც კი შოკოლადი გადნება, კარგად მოურიეთ და ტორტს ზემოდან მოასხით.
უგემრიელესი საფირმო ტორტი მზადაა.

შენიშვნა:
შოკოლადის მინანქრის მოსამზადებელ შოკოლადის ფილაში არ უნდა იყოს თხილი ან ქიშმიში.
კრემის მოსამზადებლად ნაღების ფხვნილს აუცილებლად მაცივარში გაციებული წყალი უნდა დაასხათ, რათა კრემი ფაფუკი გამოვიდეს.
„ესკიმო“, ისევე როგორც „ჭიამაიას“ სხვა პროდუქცია, მხოლოდ კარაქზე მზადდება, ამიტომ შეგიძლიათ, თამამად დააგემოვნებინოთ ბავშვებსაც და მოხუცებსაც.

გემრიელად მიირთვით!