რესტორან „შატროს“ მზარეულ დავით გიორგბერიძის ექსკლუზიური რეცეპტი.
3 ულუფისთვის საჭირო ინგრედიენტები:
ბადრიჯანი - 400 გრ;
ბულგარული წიწაკა წითელი/მწვანე - 300 გრ;
სტაფილო - 200 გრ;
კარტოფილი - 200 გრ;
ხახვი - 200 გრ;
მწვანილები: ქინძი, რეჰანი, ოხრახუში, მწვანე წიწაკა - 100 გრ;
რბილი პომიდორი - 1 კგ;
ზეთი - 300 გრ;
მარილი - გემოვნებით;
მომზადების წესი:
ზემოჩამოთვლილი ინგრედიენტები კარგად გარეცხეთ.
ბულგარული წიწაკა გაასუფთავეთ და დაჭერით წვრილად.
ცალკე ჯამზე მოათავსეთ გახეხილი სტაფილო და ასევე, ცალკე, ღრმა თეფშზე - კანგაცლილი პომიდორი.
ბადრიჯანი გათალეთ ორი საპირისპირო მხრიდან, დაჭერით გრძლად და ზეთმოსხმულ ტაფაზე შეწვით.
სანამ ბოსტნეულს ამზადებთ, დაზოგეთ დრო, დადგით ცეცხლზე კარტოფილი და მოხარშეთ.
თუკი უკვე ხახვიც წვრილად დაჭერით და მწვანილებიც, შეგიძლიათ კერძის მომზადებას შეუდგეთ.
აჯაფსანდალისთვის, სასურველია, ცოტა მოზრდილი ქვაბი აარჩიოთ, რათა ყველა ინგრედიენტი შიგ კარგად მოთავსდეს და მოითუშოს.
მაშ ასე, დადგით ქვაბი საშუალო ცეცხლზე, ჩაასხით ცოტა ზეთი და გაცხელებისთანავე ჩაყარეთ წვრილად დაჭრილი ხახვი. როგორც კი შეამჩნევთ, რომ ხახვი მოითუშა, დაამატეთ კანგაცლილი, წვრილად დაჭრილი პომიდორი.
პომიდვრის შემდეგ 2-3 წუთში ქვაბში უკვე უნდა ჩაყაროთ მოხარშული კარტოფილი და ნელ-ნელა დაუმატოთ დანარჩენი ინგრედიენტებიც (შემწვარი ბადრიჯანი, გახეხილი სტაფილო, ბულგარული წიწაკა, მწვანე წიწაკა, მწვანილები, მარილი გემოვნებით).
ბოლოს კი ჩაასხით ქვაბში იმ რაოდენობის წყალი, როგორი სისქის კერძიც გსურთ მიიღოთ (გირჩევთ - 200 გრ.-ს).
ხარშეთ ნელ ცეცხლზე - მაქსიმუმ, 15 წუთი.
ცოტა ხანში თქვენს სამზარეულოში მადისაღმძვრელი სურნელი დატრიალება, რაც იმას ნიშნავს, რომ კერძი მზად არის.
შენიშვნა:
თუკი კერძს მომზადებისას ერთ სუფრის კოვზ ტომატს დაუმატებთ, უფრო მკვეთრი ფერი და გაჯერებული გემო ექნება;
აჯაფსანდალის მომზადებას, დაახლოებით, 40 წუთი დასჭირდება;
პომიდორს ადვილად რომ გააცალოთ კანი, დაასხით ადუღებული წყალი, რამდენიმე წუთი დატოვეთ და შემდეგ მარტივად გაფცქვენით.
აჯაფსანდალი იჭმევა, როგორც ცივად, ასევე ცხლად - სურვილის მიხედვით.
გემრიელად მიირთვით!