შნიცელის მომზადება რესტორან „შატროს“ ევროპული სამზარეულოს მზარეულ ალექსანდრე კოშკელოვის რეცეპტით.
მოსამზადებლად საჭიროა:
ღორის ხორცის რბილი ნაჭერი - 300 გრამი;
კვერცხი - 1 ცალი;
პარმეზანი - 20 გრ;
ორეგანო - 2 გრამი;
კარტოფილი - 1 ცალი;
პომიდორი (სასურველია ჩერი) - 1 ცალი;
კარაქი - 20 გრამი;
ნიორი - 2 კბილი;
კამა - 2-3 ღერი;
დაფქული სუხარი - 50 გრამი.
მომზადების წესი:
ღრმა თეფშში ჩატეხეთ კვერცხი, დაამატეთ გახეხილი ყველი და ორეგანო და ეს ყველაფერი ერთად ათქვიფეთ.
გასუფთავებული და გარეცხილი ღორის ხორცის ნაჭერი ამოავლეთ ჯერ კვერცხში, შემდეგ დაფქულ სუხარში, მოათავსეთ ზეთიან ტაფაზე და შეწვით დაბალ ცეცხლზე.
კარგად გარეცხილი კარტოფილი კანიანად დაჭერით კუბიკებად და შეწვით კარაქში ცალკე ტაფაზე.
შეწვის პროცესში დაამატეთ წვრილად დაჭრილი ნიორი, მარილი, პილპილი. ბოლოს დაამატეთ შუაზე გაჭრილი პომიდორი და წვრილად დაჭრილი კამა. რამდენჯერმე მოურიეთ ფრთხილად, რომ პომიდორი არ ჩაიშალოს და გადადგით გაზქურიდან.
ახლად მომზადებული უგემრიელესი გარნირი გადაიტანეთ ოდნავ მოზრდილ თეფშზე და გვერდით დაუდეთ შემწვარი ღორის ხორცის ნაჭერი.
თქვენი შნიცელი მზად არის.
შენიშვნა:
პარმეზანი შეგიძლიათ, ნებისმიერი მშრალი ყველით ჩაანაცვლოთ.
თუკი პომიდორი ჩერი არ გაქვთ, აქაც შეგიძლიათ, ჩვეულებრივი პომიდვრით ჩაანაცვლოთ, მხოლოდ ეცადეთ, რომ ცოტა მშრალი და მაგარი პომიდორი შეარჩიოთ.
ისიც გაითვალისწინეთ, რომ ჩანაცვლების შემთხვევაში კერძს მთლიანი პომიდორი არ დასჭირდება.
გემრიელად მიირთვით!
ფოტოგრაფი: ნინუცა მანდარია
