ინდაური ნიგვზით - მოვემზადოთ შობისთვის

კულინარია

5 იანვარი 12:00
98

მსოფლიოს მრავალ  ქვეყანაშისაშობაო-საახალწლო სუფრისთვის ინდაურს, როგორც წესი, სხვადასხვა გულსართით ტენიან და ღუმელში წვავენ. საქართველოში კი, ძირითადად, საცივს ამზადებენ, რაც საკმაოდ შრომატევადია.  დღეს გთავაზობთ მარტივად მოსამზადებელ კერძს - ინდაურს ნიგვზით. მას არც ბევრი ინგრედიენტი სჭირდება, არც დრო და შეგიძლიათ, მიირთვათ როგორც ცივად, ასევე ცხლად... 

საჭირო ინგრედიენტები:
ინდაურის ხორცი - 1 კგ;
ხახვი - 600 გრ;
ქინძი - 2 საშუალო კონა;
ნიგოზი - 300 გრ;
ნიორი - 2-3 კბილი;
მარილი, შავი პილპილი და თეთრი ღვინის ძმარი - გემოვნებით.


მომზადების წესი:
გასუფთავებულ ინდაურს გააცალეთ კანი და დაჭერით საშუალო ზომის ნაჭრებად ისე, რომ ხორცი ძვალს არ მოაშოროთ;
დაჭრილი ხორცი მოათავსეთ ქვაბში.
ჩაამატეთ  გარჩეული ხახვი დაუჭრელად და გარეცხილი ქინძის მთლიანი კონები. დაასხით ოთახის ტემპერატურის წყალი ისე, რომ ხორცი დაიფაროს.
შედგით ქვაბი საშუალო ცეცხლზე  და მოხარშეთ;


როგორც კი ხორცი მოიხარშება, ქვაბიდან ფრთხილად ამოიღეთ მთლიანი ხახვი და ქინძის კონა. შემდეგ კი გაატარეთ ხორცსაკეპ მანქანაში ნიგოზთან და ნიორთან ერთად;
მოხარშული ხორცი ამოიღეთ ქვაბიდან, ოდნავ შეაგრილეთ და გააცალეთ ძვლები. შემდეგ კი, გატარებულ ინგრედიენტებთან ერთად, ჩააბრუნეთ ნახარშში. დაუმატეთ ძმარი, მარილი, შავი პილპილი და წამოადუღეთ კიდევ 2 წუთის განმავლობაში.
კერძი მზად არის.

შენიშვნა:
ინდაურის ეს ნიგვზიანი კერძი შეგიძლიათ მიირთვათ როგორც ცხლად, ასევე, ცივად;
სურვილის შემთხვევაში, ინდაურის ხორცს პირველი ნახარში წყალი შეგიძლიათ გადაუწუროთ. შემდეგ დაამატეთ ანადუღარი წყალი და მომზადება მოცემული რეცეპტის მიხედვით განაგრძეთ;
კერძის მოსამზადებლად 50 წუთი საკმარისია.

გემრიელად მიირთვით!