კომპანია Miso Robotics-ის განცხადებით, რობოტი, სახელად Flippy, მალე სწრაფი კვების ობიექტების ქსელ CaliBurger-ის 50 რესტორანში დაიდგმება. ამასთანავე, მწარმოებლები არ მალავენ, რომ რობოტებით ადამიანების შეცვლას აპირებენ.
Miso Robotics-ი 2016 წლის ივლისში რობ ანდერსონმა, რაიან სინეტმა და დევიდ ზიტომ დააარსეს.
მათ სამზარეულოში რობოდამხმარის შექმნა სურდათ. კომპანია სარესტორნო საქმესა და საკვების მომზადებაში ხელოვნური ინტელექტისა და ავტომატიზაციის დანერგვაზეა კონცენტრირებული.
Flippy სულელი არ გეგონოთ. ის უკუკავშირს იყენებს და ამიტომაც ყოველი შემწვარი კოტლეტის შემდეგ კიდევ უფრო ჭკვიანი ხდება. Flippy - ეს კონვეიერული რობოტი არ არის. მას შეუძლია, ვითარების მიხედვით იმოქმედოს. მას ახალი კოტლეტები მოაქვს და მათ მხოლოდ დამზადებისდა მიხედვით აბრუნებს. რობოტს სამუშაო ადგილზე ხუთ წუთში აყენებენ. სალაროდან მიღებული ინფორმაციის მიხედვით Flippy-მ ყოველთვის იცის, რამდენი კოტლეტი უნდა შეწვას.
რობოტს ექვსღერძიანი ხელი აქვს, რაც მას თავისუფლების მეტ ხარისხს ანიჭებს. Flippy შესაწვავად გამზადებულ კოტლეტს შესაფუთ ქაღალდს აცლის, ტაფაზე დებს, წვავს, ყურადღებით აკვირდება, რომ არ მიწვას და უკვე შემდეგ გადასცემს პერსონალს, რომელიც ბურგერს უმატებს ტოპინგებს, სოუსებს და ფუთავს.
