რატომ გაიზარდა საფრანგეთში სიგარეტზე მოთხოვნა მისი გაძვირების შემდეგ?

როგორი უცნაურიც არ უნდა იყოს, სიგარეტის გაძვირების შემდეგ მწეველთა რაოდენობა ფრანგ სპეციალისტებსა და ხელმძღვანელებში შემცირდა, მუშათა ფენაში უცვლელი დარჩა, უმუშევრებსა და ხელმოკლე ადამიანებში კი უფრო გაიზარდა.

მომხდარი ანტინიკოტინური პოლიტიკის ერთ-ერთ მთავარ პრობლემას ასახავს: სიგარეტზე ფასების ზრდა სხვადასხვა სოციალური ფენისთვის ყოველთვის ერთნაირად შედეგიანი არ არის. იმ დროს, როდესაც უზრუნველყოფილი მოსახლეობისთვის თამბაქოს მკვეთრი გაძვირება მავნე ჩვევისგან გათავისუფლების მოტივაცია ხდება, უმუშევრებში მწეველთა რაოდენობა იზრდება.

ეკონომისტები ასეთ აქციზებს ხშირად რეგრესიულს უწოდებენ. ის ყველაზე მტკივნეულად მათ ჯიბეს არტყამს, ვისაც ისედაც ცოტა ფული აქვს, ამასთან დამოკიდებულების პრობლემას ვერ აგვარებს.

რატომ ხდება ასე?

მოწევა, როგორც სტრესთან გამკლავების გზა — უმუშევრობა, ფინანსური არასტაბილურობა და სოციალური იზოლაცია ძლიერ, ქრონიკულ სტრესს იწვევს. ბევრისთვის სიგარეტი ყველაზე ხელმისაწვდომ „დასამშვიდებელ“ საშუალებად და ყურადღების გადართვის საშუალებად რჩება.

პრიორიტეტების ცვლილება — სტატისტიკა აჩვენებს, რომ დაბალი შემოსავლის მქონე ადამიანები სიგარეტზე ფასების ზრდის დროს ხარისხიან საკვებს და გართობას ელევიან, თუმცა თამბაქოს ყიდვას აგრძელებენ.

შავი ბაზრის ზრდა — სიგარეტის ფასების 66%-იანი ზრდა ააქტიურებს კონტრაბანდასა და ფალსიფიკაციას, შედეგად, ადამიანები ხარისხიანი სიგარეტიდან უფრო იაფ და საშიშ პროდუქტზე გადადიან.

დღეს საფრანგეთში სიგარეტის ფასი ასეთია:

Marlboro, Camel, Winston — დაახლოებით 13 ევრო.

Lucky Strike —12.50 – 13 ევრომდე.

შედარებით ბიუჯეტური (ეკონომ კლასის) ბრენდები 11–12 ევროს ფარგლებში იყიდება.

ანტინიკოტინური პოლიტიკა მსოფლიოს რამდენიმე ქვეყანაში გამორჩეულად წარმატებულია. ჯანდაცვის მსოფლიო ორგანიზაციის (WHO) შეფასებებითა და გლობალური ინდექსებით, ლიდერთა შორის რამდენიმე სახელმწიფო გამოირჩევა: დიდი ბრიტანეთი, თურქეთი, შვედეთი და ბრაზილია.