სამარხვო კრემი ნებისმიერი ტორტისა თუ ნამცხვრისთვის - 3 რეცეპტი

მოხარშული კრემი წყლით

• ფქვილი - 4 ს.კ.
• შაქარი - 2 ჭიქა
• წყალი - 2 ჭიქა
• ვანილინი გემოვნებით

მომზადების წესი:

1. ფქვილი მშრალ ტაფაზე დაყარეთ და საშუალო ცეცხლზე მოხალეთ, სანამ ოქროსფერი არ გახდება.

2. მოხალული ფქვილი, შაქარი და ვანილი ერთმანეთში კარგად აურიეთ.

3. მშრალი ინგრედიენტები დაბალ ცეცხლზე დადგით, თანდათან დაუმატეთ წყალი და განუწყვეტლივ ურიეთ, სანამ კრემი ერთგვაროვანი და სქელი არ გახდება. კრემი გააგრილეთ, და სურვილისამებრ გამოიყენეთ.

სოიოს კრემი

• ფქვილი - 4 ს.კ.
• შაქარი - 4 ს.კ.
• სოიოს რძე - 500 მლ.
• წყალი - 100 მლ.
• ვანილი გემოვნებით

მომზადების წესი:

1. ფქვილი მშრალ ტაფაზე, საშუალო ცეცხლზე მოხალეთ, სანამ ოქროსფერი არ გახდება.

2. სოიოს რძე, შაქარი და ვანილი აურიეთ, ცეცხლზე დაადგით და ადუღებამდე მიიყვანეთ.

3. მოხალული ფქვილი სოიოს რძეში ჩაუშვით, ცეცხლზე დაადგით, თან განუწყვეტლივ ურიეთ. კრემი, დაახლოებით, 3-5 წუთი, შესქელებამდე ადუღეთ და გააგრილეთ.

მოხარშული კრემი მანანის ბურღულით

• ნუში ან კეშიუ - 100 გრ
• მანანის ბურღული - 150 გრ.
• წყალი (მდუღარე წყალი) - 600-700 მლ.
• შაქარი - 200-250 გრ.
• ლიმონი - 1 ც.
• ვანილი გემოვნებით

მომზადების წესი:

1. ნუშს დაასხით მდუღარე წყალი და 30 წუთი გააჩერეთ. მოაცილეთ კანი, ოდნავ გააშრეთ და ბლენდერში წვრილად დააქუცმაცეთ.

2. დაქუცმაცებულ ნუშს დაუმატეთ შაქარი და მდუღარე წყალი, კარგად აურიეთ და ადუღებამდე მიიყვანეთ.

3. კრემს ნელ-ნელა დაამატეთ მანანის ბურღული და შესქელებამდე ადუღეთ.

4. ლიმონს მოაცილეთ ცედრა (ყვითელი ნაწილი) და წვენი გამოწურეთ. გაგრილებულ კრემს ლიმონის ცედრა, წვენი და ვანილი დაუმატეთ და ათქვიფეთ, სანამ ფუმფულა არ გახდება.