რამდენიმე წლის წინათ ნორვეგიულმა კომპანიამ Prox Dynamics-მა მინიატურული, უპილოტო ვერტმფრენის - PD-100 PRS Black Hornet-ის მოდელი შეიმუშავა. 15-გრამიანი, 120 მილიმეტრის დიამეტრის მქონე ვერტმფრენი შენობის შიდა და გარე პერიმეტრისა და გაშლილი სივრცეების ვიდეოთვალთვალისა და დაკვირვებისთვის არის განკუთვნილი.
ზომების მიუხედავად, ვერტმფრენს სერიოზული ფუნქცია და მახასიათებლები აქვს, რადგან მისი საშუალებით, შესაძლებელია საბრძოლო მოქმედებების წინ დაზვერვითი ხასიათის სამუშაოს ჩატარება და საეჭვო ადგილების დათვალიერება.
Black Hornet აღჭურვილია მბრუნავი ვიდეოკამერით, საიდანაც კარგი ხილვადობის პირობებში, გამოსახულების მიღება კილომეტრის რადიუსზეა შესაძლებელი.
მოწყობილობას შეუძლია, იმუშაოს ქარის პირობებში და განავითაროს 10მ/წმ სისწრაფე.
ბოლომდე დამუხტული ელემენტებით Black Hornet 30 წუთის განმავლობაში შეუჩერებლად იფრენს, თუმცა ვერტმფრენის „კუნთებზე“ შთამბეჭდავი მისი „ტვინია“. აქსელერატორებისა და ჰიროსკოპის გარდა, PD-100 აღჭურვილია ჰაერის წნევის გამზომი მოწყობილობით, რომელიც ქარის წინაღობის დაძლევაში ეხმარება.
ავტოპილოტი საკუთარ თავზე იღებს პილოტირების თითქმის მთელ პროცესს. ვერტმფრენი სივრცეში ორიენტირებას GPS-ის საშუალებით ახდენს.
კომპლექტში, ვერტმფრენის გარდა, შედის პლანშეტის ზომის მართვის პულტი, დამტენი მოწყობილობა და დამცავი შალითა.
მთლიანი კომპლექტის წონა, დაახლოებით, 1 კგ-ია. უპილოტო ვერტმფრენის პირველი პარტია უკვე გამოიყენება სხვადასხვა ცხელ წერტილში.
კომპანიის ვებგვერდზე მოწყობილობის სამოქალაქო მიზნებისთვის გამოყენების ვარიანტებსაც განიხილავენ, თუმცა ვერტმფრენის ფასი ჯერჯერობით არ ხმაურდება.