არცთუ ისე დიდი ხნის წინ ჩინური ქალაქის უჰანის (wuhan) მოსახლეობა ჯგუფებად მიაწყდა ქალაქის ცენტრში გახსნილ უცნაურ რესტორანს. საქმე ის გახლავთ, რომ რესტორანი ნამდვილი თვითმფრინავის სალონში იყო გახსნილი.
ჩინელ ბიზნესმენს ლი იანს თვითმფრინავის სალონში რესტორნის გახსნის იდეა შვედეთში მოგზაურობის დროს გაუჩნდა, როცა ერთ-ერთ ქალაქში ავიალაინერის სალონში გახსნილი სასტუმრო იხილა.
ბიზნესმენმა ინდონეზიური ავიაკომპანია batavia air-გან ჩამოწერილი „ბოინგი 737“ 5 მილიონ დოლარად შეიძინა და ცოლის - ლილის პატივსაცემად „lily airways“ დაარქვა.
ლი იანის თქმით, ამ ზომის თვითმფრინავი დიდი ოდენობით საწვავს მოიხმარს, ამიტომ ფულის დაზოგვის მიზნით, ბიზნესმენმა ავიალაინერი მშობლიურ ქალაქში დაშლილი ჩამოიტანა და ადგილზე ააწყო.
ლი იანმა გადაწყვიტა, თვითმფრინავის ბორტზე განთავსებულ რესტორანში მსოფლიოს წამყვანი ავიაკომპანიების მომსახურების სტანდარტებთან მაქსიმალურად მიახლოებული ატმოსფერო შეექმნა.
ამისთვის გულმოდგინედ შერჩეულ და ბორტგამცილებლების უნიფორმებში გამოწყობილ ოფიციანტებს სპეციალური ინსტრუქტაჟი ჩაუტარდათ.
თვითმფრინავი რესტორანი ქალაქის გერმანულ სტილში აგებულ რაიონში განთავსდა. რესტორანს, რომელშიც მხოლოდ 20 მაგიდაა, დღის განმავლობაში, დაახლოებით, 200 ადამიანი სტუმრობს. აქ მოხვედრის მსურველებმა თვითმფრინავის ბილეთი უნდა შეიძინონ, „რეგისტრაცია“ გაიარონ და სპეციალური მოსაცდელი დარბაზის გავლით, თვითმფრინავის სალონში ავიდნენ.
თვითმფრინავის რესტორნის უგემრიელესი კერძების ფასები 25-დან 60 დოლარამდე მერყეობს. ლი იანმა რესტორნიდან მიღებული შემოსავლით თვითმფრინავის ღირებულება უკვე აანაზღაურა და იმედოვნებს, რომ „lily airways“ მხოლოდ ჩინელებისთვის კი არა, ტურისტებისთვისაც საყვარელი ადგილი გახდება.
