ეს ახალი ავტომობილები თორიუმზე იმუშავებს.
თორიუმი რუხი ფერის, რბილი, წელვადი ლითონია, რომელსაც სახელი სკანდინავიური მითოლოგიის მეხის ღმერთის - თორის პატივსაცემად ეწოდა.
ის პლანეტაზე არსებული ერთ-ერთი ყველაზე მჭიდრო მასალაა: 1 გრამი 20 მილიონჯერ მეტ ენერგიას შეიცავს, ვიდრე იმავე წონის ნახშირი და იმაზე მეტ ენერგიას გამოჰყოფს, ვიდრე 28 000 ლიტრი ბენზინი.
ეს თვისებები თორიუმს ენერგიის იდეალურ წყაროდ აქცევს. თორიუმზე მომუშავე ავტომობილის საწვავით მომარაგება საჭირო არ არის, რადგან მანქანა იმაზე სწრაფად დაძველდება, ვიდრე თორიუმი გამოილევა.
ასეთი ავტომობილის მოდელი უკვე გამოჩნდა.
კომპანია laser power systems-ის გენერალური დირექტორის ჩარლზ სტივენსის თქმით, თორიუმის უნიკალური თვისებების შესახებ შემთხვევით შეიტყვეს: „ავტომობილი ჩვენს ძირითად ბიზნესს არ წარმოადგენს. ჩვენ თორიუმის ბაზაზე, ლაზერის შექმნაზე ვმუშაობთ და აღმოვაჩინეთ, რომ ის სინათლის სხივს კი არა, უზარმაზარ სითბურ ტალღას წარმოშობს. გადაწყდა, რომ ეს ეფექტი ძრავის შექმნისთვის გამოგვეყენებინა, თუმცა ავტომწარმოებლებს ტექნოლოგიის შეძენა ჯერჯერობით არ სურთ“.
სტივენსის აზრით, დაახლოებით, ორი ათეული წელი დასჭირდება, სანამ მსხვილი ავტომწარმოებლები, რომლებიც ბენზინზე მომუშავე მანქანებით მილიონებს შოულობენ, სხვა კონსტრუქციის ძრავის განხილვას შეუდგებიან.
სტივენსის თქმით, ჩვეულებრივ, კონდიციონერის ზომის ტურბინას, რომელიც თორიუმზე მუშაობს, შეუძლია უზარმაზარი შენობები იაფი ელექტროენერგიით უზრუნველყოს.
თორიუმის რადიოაქტიურობა მინიმალურია და მისი შეკავება ჩვეულებრივი ფოლგითაც შესაძლებელია. თორიუმი არ იწვევს ბირთვულ რეაქტორებზე საშიშ ავარიებს და შეუძლია, იაფი ენერგიით მსოფლიო სამუდამოდ უზრუნველყოს, თანაც - რადიაქტიური ნარჩენებისა და დანარჩენი პრობლემების გარეშე, რომლებსაც ბირთვული ენერგიის გამოყენება იწვევს.