წელს ელისაბედ მეორემ ეს მნიშვნელოვანი მისია შვილს გადააბარა. აღსანიშნავია, რომ ადრე პრინცი ჩარლზი სამგლოვიარო ცერემონიას მხოლოდ დედოფლის არყოფნის შემთხვევაში უძღვებოდა.
ბუკინგემის სასახლის პრესმდივანმა ეს ფაქტი ასე ახსნა: „დედოფალს სურს, რომ აივანზე, ედინბურგის ჰერცოგის გვერდით იდგეს“.
ბრიტანელები ეჭვობენ, რომ ეს ფაქტი დედოფლის ასაკსა და შესაძლოა, სამეფო ტახტის მემკვიდრის დასახელებისთვის მზადებას უკავშირდება.
ერთ-ერთი ბრიტანული გამოცემა წერს: „ფაქტი შეიძლება შეფასდეს, როგორც სამეფო უფლებამოსილებების ტახტის მემკვიდრისთვის თანდათან გადაცემა“.
ბრიტანელების ვარაუდით, დედოფალი ტახტს შვილიშვილს, პრინც უილიამს გადასცემს, თუმცა ბუკინგემის სასახლეში ამ ინფორმაციას არ ადასტურებენ.
თუ დედოფალმა მემკვიდრე არ დაასახელა, ბრიტანეთის მომავალი მეფე პრინცი ჩარლზი გახდება.
„ის უკვე ხანდაზმულია და პრინცი უილიამივით პოპულარულიც არ გახლავთ. ამასთანავე, ბრიტანელებს უილიამის ცოლი კეიტი უფრო უყვართ, ვიდრე ჩარლზის მეუღლე კამილა, რომელსაც დღემდე არ პატიობენ ჩარლზისა და დიანას დაშორებას“, - ამბობს ბრიტანელი ჟურნალისტი ოლივია მეისონი.
ყველაფერთან ერთად, ბოლო დროს, ჩარლზის სახელს ხმაურიანი სკანდალი დაუკავშირდა. აღმოჩნდა, რომ მან ოფშორულ ზონაში რეგისტრირებულ მეგობრის კომპანიაში 3 მილიონ ევროზე მეტი გადარიცხა. ის ფაქტი, რომ პრინცმა თავისი შემოსავლების მეგობრის კომპანიაში დამალვა სცადა, ბრიტანელების თვალში მისი ისედაც შელახული რეპუტაცია უფრო დააკნინა.
დედოფალი ელისაბედ მეორე მხოლოდ ბრიტანეთში კი არა, მთელ მსოფლიოში უყვართ და აფასებენ, რასაც ვერ ვიტყვით მის შვილზე. ასე რომ, რით დასრულდება სამეფო კარზე დაწყებული პროცესები, დრო გვაჩვენებს.
