10 წლის წინათ, ცეცხლსასროლი იარაღით მიყენებული ჭრილობებისგან, ენდი სენდესმა, ფაქტობრივად, სახე დაკარგა. ახალგაზრდა კაცი წლების განმავლობაში სახლიდან არ გამოდიოდა, სარკეში არ იყურებოდა და თითქმის არავის ეკონტაქტებოდა. ცხოვრების თავიდან დაწყების იმედი მხოლოდ 2012 წელს გაჩნდა, როცა მაიოს კლინიკამ სახის გადანერგვის პროგრამაზე მუშაობა დაიწყო და 2016 წელს ენდი სახის ტრანსპლანტაციის მსურველთა სიაში შეიყვანა.
კალენ როსი ჯერ კიდევ სიცოცხლეში დასთანხმდა სხეულის რამდენიმე ნაწილის, მათ შორის, სახის დონორი გამხდარიყო. მისი გარდაცვალების შემდეგ მის მეუღლეს ლილი როუზს მაიოს კლინიკის ექიმი სამირ მარდინესი დაუკავშირდა და კალენის სახის ტრანსპლანტაციაზე ნებართვა სთხოვა. ექიმის თქმით, კალენსა და ენდის ერთი ჯგუფის სისხლი და მსგავსი სახის სტრუქტურა ჰქონდათ, რაც წარმატებული ოპერაციისთვის მნიშვნელოვანი ფაქტორი გახლდათ.
ლილი იხსენებს, რომ ექიმის წინადადების განხილვისას გადამწყვეტი ორსულობა აღმოჩნდა. იმ დროისთვის, კალენის 32 წლის ქვრივი რვა თვის ორსული იყო და მომავალში შეძლებდა, შვილისთვის ეთქვა, რომ მისმა მამამ სხვა ადამიანი გადაარჩინა. სახის ტრანსპლანტაციის ოპერაცია 56 საათს გრძელდებოდა, რის შემდეგაც ენდი სანდესმა, ბოლოს და ბოლოს, ხალხში გამოჩენა გაბედა. ლილი როუზი მაიოს კლინიკაში შვილთან ერთად მივიდა, რათა ენახა მამაკაცი, რომელსაც მისი გარდაცვლილი ქმრის სახე გადაუნერგეს.
ლილი ამ შეხვედრას შიშით ელოდა. მას ეგონა, რომ გარდაცვლილი ქმრის ასლს იხილავდა, თუმცა რეალობა განსხვავებული აღმოჩნდა. თვალები სრულიად სხვა იყო და სახის ნაცნობი ნაკვთებიც კი განსხვავებულად გამოიყურებოდა.
„ადრე ქუჩაში გასვლისა და ადამიანების დანახვის მეშინოდა. ახლა კი თითქოს თავიდან დავიბადე და იმის სურვილი გამიჩნდა, რაც დიდი ხანია, არ გამიკეთებია - ქუჩაში გასვლა, ადამიანებთან საუბარი, რესტორანში ვახშმობა და ცეკვა მომინდა. მე ძალიან ვაფასებ თქვენს საჩუქარს და იმედს არ გაგიცრუებთ“, - უთხრა ენდიმ ლილის შეხვედრისას.
ენდისთვის ოპერაციის შემდგომი რეაბილიტაციის პროცესი ჯერ არ დასრულებულა. ის მედიკამენტებს იღებს, კანის მასაჟს იკეთებს და თავიდან სწავლობს ლაპარაკს.
„მე ვამაყობ საკუთარი ქმრით. კალენმა სრულიად უცნობ ადამიანს მეორე სიცოცხლე აჩუქა“, - ამბობს ლილი.