ბისკვიტისთვის დაგჭირდებათ:
კვერცხი - 4 ცალი
შაქარი - 120 გრ
კაკაო - 20 გრ
ფქვილი - 110 გრ
გამაფხვიერებელი - 1 ჩ/კ
დაფქული მიხაკი (დანის წვერზე), დარიჩინი, ჯანჯაფილი, მუსკატის კაკალი - გემოვნებით
კრემისთვის დაგჭირდებათ:
შოკოლადის მასკარპონე (მარკეტებში იყიდება) – 250 გრ
შოკოლადი - 100 გრ
კონიაკი - 2 ს/კ
შოკოლადის ფირფიტები - მოსართავად
მომზადების წესი:
1. გაცრილი ფქვილი, კაკაო, გამაფხვიერებელი და სუნელები ერთმანეთში აურიეთ. ცალკე ჯამში კვერცხი და შაქარი ისე ათქვიფეთ, რომ მოცულობაში ორჯერ მოიმატოს და ფქვილოვან მასას შეურიეთ.
2. ღუმელის თუნუქის ფურცელზე ცხიმწასმული საცხობი ქაღალდი დააფინეთ, ცომი დაასხით და თანაბრად გაანაწილეთ. ბისკვიტი 180 გრადუსზე გახურებულ ღუმელში 12 წუთი აცხვეთ. შემდეგ გამოიღეთ და გააგრილეთ.
3. კრემის მოსამზადებლად ოთახის ტემპერატურის მასკარპონე ოდნავ ათქვიფეთ, დაუმატეთ გამდნარი შოკოლადი და კონიაკი. მიქსერი დაბალ სიჩქარეზე გადაიყვანეთ და კრემი კიდევ რამდენიმე წუთი თქვიფეთ.
4. მუყაოსგან გირჩის ფორმის ტრაფარეტი გამოჭერით. გაგრილებული ბისკვიტი თანაბარი ზომის 3-4 ცალ მართკუთხედად დაჭერით. მართკუთხედები ერთმანეთზე დაალაგეთ, თავზე მუყაოს ტრაფარეტი დაადეთ და ბასრი დანით ბისკვიტს კიდეები ისე ჩამოაჭერით, რომ ტრაფარეტის ფორმა მიიღოთ. სცადეთ, ეს ძალიან ადვილია.
5. ბისკვიტის თითოეულ ფენას კრემი წაუსვით და ერთმანეთზე დაალაგეთ. მორჩენილი კრემი ტორტს თავზე და გვერდებზე წაუსვით და შოკოლადის ფირფიტებით, რომელიც ყველა შოკოლადის მაღაზიაში იყიდება, გააფორმეთ.
6. მზა ტორტი რამდენიმე საათით მაცივარში შედგით.
გემრიელად მიირთვით!