ბლინი ორაგულით ნაღების სოუსში
ერთი პორცია (4 პერსონისთვის):
კვერცხი - 2 ც
ფქვილი - 100 გრ
რძე - 150 გრ
ორაგულის ფილე - 150 გრ
ქამა სოკო - 40 გრ
წითელი ხიზილალა -20 გრ
სალათის ფოთლები - 30 გრ
არაჟანი - 30 გრ
ნაღები - 150 გრ
ჩვეულებრივი ზეთი - 20 გრ
ლიმონი - 1 ც
სოიოს სოუსი - 1 ჩ/კ
მარილი გემოვნებით
მომზადების წესი:
თავიდან ვაკეთებთ ბლინების მასალას:
საშუალო ზომის თასში ვასხამთ კვერცხის შიგთავსს, რძეს, ვამატებთ ფქვილს, ცოტა მარილს და მიქსერით ვურევთ, დაახლოებით, 2-3- წუთი. ბლინის მასალა მზადაა.
სანამ ბლინების შეწვას დაიწყებთ ორაგულის ფილე და ქამა სოკო დაჭერით პატარა თხელ ნაჭრებად.
გადავდივართ ბლინების შეწვაზე: თხელძირიან ტაფაზე ვასხამთ ცოტა ზეთს და მთელ ტაფაზე ქაღალდით ვუსვამთ. შემდეგ ვასხამთ ბლინის მასალას „კლეტკების“ ფორმით (როგორც ფოტოზეა ნაჩვენები, თუმცა შეგიძლიათ, ჩვეულებრივი ბლინის ფორმა მისცეთ) და დაბალ ცეცხლზე ვაცხობთ, დაახლოებით, 2 წუთი.
ბლინი ორივე მხრიდან ზომიერად უნდა შეიწვას, რასაც 3-4 წუთი დასჭირდება.
გამომცხვარ ბლინებს ვათავსებთ დიდ თეფშზე (შეგიძლიათ, ერთმანეთზე დააწყოთ ფრთხილად).
ორაგული ნაღების სოუსში:
მაღალ ცეცხლზე ვდგამთ სქელძირიან ტაფას, ვასხამთ ცოტა ზეთს, ცოტა მარილს და შიგნით ვყრით ორაგულის დაჭრილ ფილეს. დაახლოებით, 3 წუთი ვწვავთ (ფილე ძალიან არ უნდა გამოშრეს) და სულ ვურევთ, რათა ტაფაზე არ მიიკრას. სანამ ბოლომდე შეიწვება ვაყრით ქამა სოკოს და კიდევ 2 წუთის განმავლობაში ვწვავთ უკვე დაბალ ცეცხლზე. შემდეგ ვასხამთ ნაღებს, არაჟანს, ვუმატებთ ხიზილალას, სოიოს სოუსს და კიდევ ცოტა ხანს ვწვავთ ერთად (ამ ყველაფრის მომზადებას, დაახლოებით, 8-10 წუთი სჭირდება).
შემწვარ ბლინს ვდებთ დიდ თეფშზე, ბლინზე ვალაგებთ 2-3 ცალ სალათის ფოთოლს და ზედ ვასხამთ მომზადებულ ორაგულის ფილეს (ეს შიგთავსი თვალით გაანაწილეთ ყველა ბლინისთვის), შემდეგ კი რულეტივით ვახვევთ (მსგავსი წესით ვახვევთ ყველა ბლინს). ორაგულიანად გადახვეული ბლინების რულეტებს ზემოდან ვასხამთ დარჩენილ ნაღების სოუსს. გვერდებზე მიუწყვეთ რამდენიმე ნაჭრებად დაჭრილი ლიმონი.
კერძი მზადაა.
შენიშვნა:
ზემოთ აღნიშნული რაოდენობის საბლინე მასალიდან 4-5 ბლინი გამოდის.
ლიმონის წვენი კერძს ზემოდან უნდა მოასხათ მირთმევის წინ.
აღნიშნული კერძის მომზადებას, დაახლოებით, 15-20 წუთი სჭირდება.
გემრიელად მიირთვით!..