„მთვრალი ალუბლის“ რეცეპტი თავისუფლების მოედნის #4 მდებარე საკონდიტრო „lik @ nik“-ას გამოცდილმა კონდიტერმა დოდო ებანოიძემ ექსკლუზიურად მოგვაწოდა.
ბისკვიტის ინგრედიენტები:
კვერცხი - 8
შაქარი - 8 სუფრის კოვზი
ფქვილი - 8 სუფრის კოვზი
კაკაო - 100 გრ.
ვანილი
კვერცხის გულები და ცილა გააცალკევეთ. გული შეინახეთ, ცილებს კი შაქარი დააყარეთ და მიქსერით მკვრივი ბეზეს წარმოქმნამდე თქვიფეთ.
როცა ბეზე ისე გამაგრდება, რომ ჯამის გადმოტრიალებისას არ გადმოვა, სათითაოდ შეათქვიფეთ კვერცხის გულები. რამდენიმე წუთი თქვიფეთ და მიქსერი ამოიღეთ.
ცალკე ჯამში აურიეთ გაცრილი ფქვილი, კაკაო, ვანილი და ხის კოვზის დახმარებით ფაქიზად შეურიეთ ათქვეფილ კვერცხში. გამზადებული ცომი დაასხით ცხიმწასმულ კალკაზე და 20 წუთის განმავლობაში საშუალო ცეცხლზე გამოაცხვეთ.
დასანამი სეროფის ინგრედიენტები:
წყალი - 1 ლიტრი
შაქარი - ნახევარი ჭიქა
კონიაკი - 1 სუფრის კოვზი
ხსნადი ყავა - ერთი სუფრის კოვზი
შაქარი და წყალი წამოადუღეთ და გაგრილების შემდეგ დაუმატეთ კონიაკი და ყავა.
კრემის ინგრედიენტები:
წყალი - 1 ლიტრი
ფქვილი - 1 ჭიქა
შაქარი - 1 ჭიქა
კარაქი - 200 გრ.
შოკოლადი - 50 გრამი
ვანილი - დანის წვერით
ფქვილი და შაქარი ერთმანეთში კარგად აურიეთ.
ნელ-ნელა დაასხით წყალი და შეუჩერებელი მორევით, კრემი მოადუღეთ.
წამოდუღებიდან 2-3 წუთში ქვაბი ცეცხლიდან გადმოდგით და კრემი გააგრილეთ.
გაციებულს შეათქვიფეთ ცალკე ათქვეფილი კარაქი, ორთქლზე გამდნარი შოკოლადი და ვანილი.
ტორტის მომზადება:
გამომცხვარი ბისკვიტი ჯერ სიგანეზე გაჭერით, შემდეგ სიგრძეზე.
გამოვა 4 ფენა, რომლებიც ერთმანეთზე უნდა დაალაგოთ.
თითოეული ფენა კარგად დანამეთ, მოაწყვეთ კურკებგამოცლილი ალუბალი, წაუსვით კრემი და დაადეთ წინასწარ დანამული მეორე ფენა.
ასე გაიმეორეთ ყველა ფენაზე და ბოლოს თავზე მოასხით 200 გრამი გამდნარი შოკოლადი.
გემრიელად მიირთვით!