შავი ღვინის სოუსში მომზადებული ხბოს ხორცის რეცეპტს რესტორან „შატროს“ ევროპული სამზარეულოს მზარეული ალექსანდრე კოშკელოვი გვიზიარებს.
ხბოს ხორცის შავი ღვინის სოუსში მოსამზადებლად საჭიროა:
ხბოს ხორცი - 250 გრ;
სტაფილო - 1 ცალი;
ხახვი - 1 თავი;
შავი ღვინო - 800 გრ;
როზმარინი - 1 ჩაის კოვზი;
მარილი და შავი პილპილი - გემოვნებით;
თაფლი - 1 სუფრის კოვზი;
შავი ბალზამიკო - 1 ჩაის კოვზი.
მომზადების წესი:
საშუალო ზომის ქვაბში ჩაასხით შავი ღვინო და მოათავსეთ შიგ კარგად გარეცხილი, დაჭრილი ხბოს ხორცი.
როგორც კი ხორცი წამოდუღდება, დაამატეთ კუბიკებად დაჭრილი სტაფილო და ოთხ ნაწილად დაჭრილი ხახვი. რა თქმა უნდა, არ დაგავიწყდეთ მარილი, პილპილი - გემოვნებით და 1 ჩაის კოვზი როზმარინი.
როგორც კი ხორცი და სტაფილო მოიხარშება, ამოიღეთ ქვაბიდან.
ეს სტაფილო და ხახვი აღარ დაგჭირდებათ, ხოლო ხორცი ცალკე ჭურჭელში მოათავსეთ.
ქვაბში დარჩენილ ღვინოს დაუმატეთ 1 სუფრის კოვზი თაფლი და 1 ჩაის კოვზი შავი ბალზამიკო.
ადუღეთ შავი ღვინო გასქელებამდე, დაახლოებით, 5-10 წუთი.
ხბოს ხორცი გადაიტანეთ მოზრდილ თეფშზე და ზედ მოასხით ღვინის სოუსი.
შენიშვნა:
ხბოს ხორცი შავი ღვინის სოუსში შეგიძლიათ, გემრიელი გარნირით გაამდიდროთ: ზეთში მოთუშეთ დაჭრილი სტაფილო, ბროკოლი და თეფშზე მოთავსებულ კერძს გვერდით მოუწყვეთ.
თუკი მოხარშული ხბოს ხორცი სპეციალური სოუსის მომზადებამდე გაგრილდა, ჩააბრუნეთ ღვინიან ქვაბში და თეფშზე სოუსთან ერთად გადმოიღეთ.
თუკი უფრო მოტკბო გემო გსიამოვნებთ, ღვინის სოუსს შეგიძლიათ, უფრო მეტი რაოდენობის თაფლი დაამატოთ.
ამ კერძის მოსამზადებლად, დაახლოებით, 40 წუთი დაგჭირდებათ.
გემრიელად მიირთვით!
ფოტოგრაფი: ნინუცა მანდარია
