ინგლისელები გამოუცხობ ჩიზქეიქს ამჯობინებენ, რომელსაც ყველში ჟელატინი აქვს დამატებული. ფრანგები ნუგბარს ყველით აკეთებენ და ხილით რთავენ. იაპონელები ყველში ჩაის ურევენ, ბელგიელები და ჰოლანდიელები კი ჩისქეიქს ორცხობილასა და შოკოლადის ნაფხვენებს აყრიან. ჩიზქეიქისთვის ძირითადად, ფილადელფიური ყველი გამოიყენება, თუმცა ქართულ რეალობაში შეგვიძლია, წარმატებით ჩავანაცვლოთ ხაჭოთი და არაჟნით.
ჭავჭავაძის გამზირის N75-ში მდებარე რესტორანი „შატროს“ევროპული სამზარეულოს შეფ-მზარეული ალექსანდრე კოშკელოვი, ექსკლუზიურად „funtime“-ის მკითხველისთვის, უგემრიელესი და მარტივად მოსამზადებელი ჩიზქეიქის რეცეპტს გაგვიზიარებს.
ჩიზქეიქის ძირისთვის საჭიროა:
კვერცხი - 2 ცალი
შაქარი - 100 გრ
კარაქი - 100 გრამი
ფქვილი - 100 გრამი
კვერცხი და შაქარი კარგად ათქვიფეთ.
დაუმატეთ კარაქი, ფქვილი, კიდევ რამდენიმე წუთით თქვიფეთ და ცომი ღრმა, ცხიმწასმულ ფორმაში ჩაასხით.
ფორმა 170 გრადუსზე გახურებულ ჰაერღუმელში შედგით.
დაახლოებით, 15-20 წუთის განმავლობაში გამოაცხვეთ.
ჩიზქეიქის ზედა ფენისთვის საჭიროა:
ხაჭო - 800 გრ.
არაჟანი - 650 გრ.
შაქარი - 170 გრ
ფქვილი - 100 გრ
5 ლიმონის ცედრა (გახეხილი კანი)
1 ფორთოხლის ცედრა
ზემოჩამოთვლილი ინგრედიენტები მიქსერში კარგად ათქვიფეთ და ჩაასხით იმავე ფორმაში, რომელშიც ჩიზქეიქის გამომცხვარი ძირია.
შედგით ჰაერღუმელში 150 გრადუსზე და აცხვეთ, დაახლოებით, 1 საათის განმავლობაში.
ჩიზქეიქის ზედა ფენა ძალიან კარგად უნდა გამოცხვეს, ამიტომ, პერიოდულად, ხის წვრილი ჩხირით შეამოწმეთ. ჩხირი სრულიად მშრალი უნდა იყოს.
შენიშვნა:
გამომცხვარი ჩიზქეიქი მოყავისფრო-ოქროსფერი უნდა იყოს.
გაითვალისწინეთ, რომ სანამ არ გაცივდება, ჩიზქეიქის ფორმიდან ამოღება არ შეიძლება, რადგან აუცილებლად დაიშლება.
გაცივებულ დესერტს მოაფრქვიეთ შაქრის პუდრა.
თუ გაქვთ, მოაწყვეთ ცოცხალი ჟოლო ან ფორთოხლის ნაჭრები და ჟოლოს ტოპინგი მოასხით.
გემრიელად მიირთვით!
ფოტოგრაფი ნინუცა მანდარია.
