- პაატა, შეიძლება ითქვას, რომ შოუბიზნესიდან ბიზნესზე გადაერთეთ?
- შოუბიზნესში მაინც ვრჩები, რადგან ჩემი ძირითადი საქმიანობა სიმღერაა. ბიზნესის წამოწყება ჩემმა მეგობარმა გიორგი ლეგაშვილმა შემომთავაზა, რომელსაც სარესტორნო საქმეში მრავალწლიანი გამოცდილება აქვს. მითხრა, რომ ბუდაპეშტის ქუჩაზე შეგვეძლო ჩვენთვის საყვარელი ადგილი შეგვექმნა. Baron bier ექსკლუზიური გერმანული ბრენდია. ვცდილობთ, მომხმარებელს სიახლე ყოველდღე შევთავაზოთ. ბარი 2 ოქტომბერს გაიხსნა. გარემო პატარა და მყუდროა, თუმცა სცენისთვისაც შევძელით ადგილის გამოყოფა.
- რა ტიპის საღამოებს გეგმავთ და ვისი მოსმენა შეიძლება „Baron bieron“-ში?
- პარასკევი, შაბათი და კვირა მუსიკალურადაც დატვირთულია. სამეგობროც გვსტუმრობს და ის ადამიანებიც სიამოვნებით მოდი+ან, ვინც გახსნის დღიდან ჩვენი სტუმრები არიან. ჩემი სოლო პროგრამა გავაკეთე. კვირაში სამი დღე, საათი და ათი წუთი ვიმღერებ. სხვათა შორის, ბარის სტუმარი მოისმენს სიმღერებს იმ რეპერტუარიდან, რომელიც ჯერ არსად გაჟღერებულა. „Baron bieron“-ში ალბომის პრეზენტაციასაც ვგეგმავ. ჩემ გარდა, სტუმრების წინაშე სხვა შემსრულებლებიც წარდგებიან.
- რა სეგმენტზეა გათვლილი ბარი და რით არის გამორჩეული თქვენი მენიუ?
გიორგი ლეგაშვილი: საქართველოში სეგმენტის დაყოფა ძალიან ძნელია. ჩვენი აქცენტი და დევიზია, რომ სტუმრისთვის მუსიკაც გემოვნებიანი იყოს და მომსახურებაც ხარისხიანი. რაც შეეხება მენიუს, ქართულ-ევროპული სამზარეულოს ფართო ასორტიმენტი გვაქვს. სამზარეულოში დახვეწილი და კვალიფიციური მზარეულები მუშაობენ. ჩემი გამოცდილება მაძლევს საფუძველს, ვიცოდე, მომხმარებელს როგორი მიდგომა სჭირდება.