კომპანია ,,დიო’’ -ს არქიტექტორთა კლუბის იუბილისადმი მიძღვნილი ღონისძიება 27 აპრილს, 17:00 სთ-ზე, Hard Rock Café-ს ტერასაზე გაიმართება. სადღესასწაულო საღამოს კლუბის წევრი არქიტექტორები, თბილისის აპოლონ ქუთათელაძის სახელობის სახელმწიფო სამხატვრო აკადემიისა და ტექნიკური უნივერსიტეტის არქიტექტურის ფაკულტეტის დამამთავრებელი კურსის სტუდენტები დაესწრებიან.
„დიომ“ სპეციალურად კლუბის წევრებისთვის იტალიური პარტნიორი ფირმა ,,მოტურას’’ წამომადგენელი მოიწვია, რომელიც ქართველ არქიტექტორებსა და სტუდენტებს ფირმის პროდუქციას, მუშაობის სპეციფიკას გააცნობს და იტალიაში განხორციელებულ პროექტებზე ისაუბრებს.
ასევე, ღონისძიებაზე მოეწყობა გასული წლის პროექტების გამოფენა, რომლებიც კლუბის წევრმა არქიტექტორებმა, კომპანია „დიოსთან“ ერთად, საქართველოში განახორციელეს. ღონისძიების ბოლოს საზეიმო ვითარებაში სამი გამორჩეული არქიტექტორი დაჯილდოვდება.
„კლუბის შექმნის მიზანია კომპანია „დიოს“ ირგვლივ ყველა წამყვანი და აქტიური არქიტექტორის გაერთიანება, რათა შევძლოთ ორმხრივი თანამშრომლობის ფარგლებში პირველებს მივაწოდოთ საჭირო ინფორმაცია ჩვენი ექსკლუზიური პროდუქტების შესახებ, მოვისმინოთ მათგან რჩევები და ერთად ვიმუშაოთ საინტერესო პროექტებზე,’’ - განაცხადა ,,დიოს’’ გენერალურმა დირექტორმა ირმა დაუშვილმა.
დღეს კომპანია ,,დიოს“ არქიტექტორთა კლუბში 80-მდე არქიტექტორია გაერთიანებული. კლუბის წევრობა სამომავლოდ ნებისმიერ არქიტექტორს შეეძლება, ვინც განაცხადის ფორმას შეავსებს.
კლუბის აქტიურ წევრებს აქვთ შესაძლებლობა:
მიიღონ მონაწილეობა ,,დიო’’-ს მიერ გამოცხადებულ კონკურსებში;
ესტუმრონ „დიოს“ პარტნიორ კომპანიებს ევროპის სხვადასხვა ქვეყანაში;
დაესწრონ სპეციალურად მოწვეული, მსოფლიო დონის არქიტექტორების ვორქშოპებს.
