ყოველდღიური პროცედურები, რომლებსაც არასწორად ვაკეთებთ

სუნთქვა - სწორი სუნთქვა რომ ისწავლოთ, ჩვილებს უნდა დააკვირდეთ - ისინი მუცლით, ანუ დიაფრაგმით სუნთქავენ. რას ასე ადვილად გამოსდით პატარებს, არც ჩვენთვის უნდა იყოს რთული.

კბილების გამოხეხვა - ყველამ ვიცით, რომ კბილების გამოხეხვა დილა-საღამოს აუცილებელია.  როგორც სპეციალისტები ამტკიცებენ, უმჯობესია, კბილები საუზმემდე ანდა საკვების მიღებიდან 30 წუთის შემდეგ გაიხეხოთ. საქმე ის არის, რომ საკვებში არსებული მჟავები კბილის ემალს ასუსტებს  და ამიტომ, როცა საუზმის შემდეგ იხეხავთ კბილებს, ამით მათ უფრო მეტად აზიანებთ. რაც შეეხება პირის ღრუში წყლის გამოვლებას, უმჯობესი იქნება, თუ ცოტაოდენ კბილის პასტას დაიტოვებთ - პასტაში შემავალი ფტორიდები კბილებს იცავს.

დგომისა და ჯდომის მანერა - ყურადღება მიაქციეთ, რომ ზურგს საყრდენი ჰქონდეს, ფეხები კომფორტულად ეყრდნობოდეს იატაკს და კომპიუტერის მონიტორიც ხელის გაწვდენაზე იყოს. დგომისას ეცადეთ, სხეულის წონა ფეხებზე თანაბრად გადაანაწილოთ. ხერხემალი და თეძო კი ერთ ხაზზე უნდა იყოს გამართული.

ხელის დაბანა - თურმე ბევრი ჩვენგანი არასწორად იბანს ხელს. საპნის ქაფი თანაბრად უნდა გადაანაწილოთ ხელებსა და თითებზე. ეს პროცედურა 20-30 წამი უნდა გაგრძელდეს. 

კლავიატურაზე ბეჭდვა - ალბათ, შეგიმჩნევიათ კლავიატურის ქვეშ პატარა ფეხები. მათი მისია ის არის, რომ კლავიშებზე წარწერა კარგად დაინახოთ. თუკი ბრმად ბეჭდავთ, მაშინ კლავიატურის ფეხებს სულაც ნუ გაშლით. ამით ხელის მტევანი ნაკლებად მოგეხრებათ და დიდხანს არ დაგეღლებათ.