- რა არის თქვენთვის სრულყოფილი ბედნიერება?
- ჩემთვის ბედნიერება არის სუბიექტური კმაყოფილების გრძნობა.
- ბოლოს როდის გაიცინეთ?
- ახლახან, რამდენიმე წუთის წინ.
- ბოლოს როდის იტირეთ?
- რამდენიმე დღის წინ.
- თქვენი ხასიათის მთავარი შტრიხი...
- არ ვიცი, ამაზე არ მიფიქრია...
- ყველაზე დიდი ნაკლი...
- ბევრი მაქვს.
- ყველაზე მეტად რომელ ისტორიულ ფიგურასთან აიგივებთ თავს?
- არ ვაიგივებ, მაგრამ მომწონს მეფე ერეკლე.
- ვინ არიან თქვენი გმირები დღეს?
- ჩვეულებრივი ადამიანები, რომლებიც ყოველდღიურ ცხოვრებას უმკლავდებიან.
- თქვენი მხატვრული გმირები...
- სავარსამიძე და ჰამლეტი.
- ყველაზე შთამბეჭდავი მოგზაურობა.
- შუა აზიაში.
- თვისება, რომელსაც უპირატესობას ანიჭებთ მამაკაცში...
- პასუხისმგებლობის გრძნობა.
- ქალში?
- წესიერება, ოღონდ არა - ტრადიციული გაგებით.
- საყვარელი მწერლები....
- უილიამ შექსპირი და კონსტანტინე გამსახურდია. ოღონდ არა იმიტომ, რომ ბაბუაჩემი იყო.
- საყვარელი კომპოზიტორი...
- სერგეი რახმანინოვი.
- ფილმი?
- არ მეგულება ასეთი.
- რას მიიჩნევთ თქვენს ყველაზე დიდ მიღწევად?
- „ზრდასრულობა გამოიხატება მაშინ, როცა ხვდები, რომ სამყაროს შენ მიმართ წინასწარ განზრახული დამოკიდებულება არ აქვს“ - აი, ამის მიხვედრას.
- რა არის სამშობლო?
- სამშობლოს რაც შეეხება, ჩემთვის, გარკვეულწილად, ეს პირობითი ცნებაა, რადგან თავი საკმაოდ ჩამოყალიბებულ მსოფლიო მოქალაქედ მიმაჩნია. მეტიც, ვფიქრობ, რომ თვითონ ადამიანად ყოფნაა, ასე ვთქვათ, სიზმრის ნაწილი. სამშობლო ჩვენი საარსებო არეალია, რომელსაც უნდა გავუფრთხილდეთ, მოვუაროთ და უკეთესი დავტოვოთ, ვიდრე ჩვენს მოსვლამდე იყო.
- რა არის თქვენთვის ყველაზე ძვირფასი?
- არ მახსენდება.
- რისი გეშინიათ ყველაზე მეტად?
- შეცდომის, რომელმაც შეიძლება, სხვა ადამიანს ზიანი მიაყენოს.
- თარიღი, რომელსაც თქვენი ცხოვრებიდან გამოტოვებდით...
- არც ერთი.
- როგორ ისურვებდით სიკვდილს?
- სულ ერთია.
- თუკი ოდესმე ღმერთს შეხვდებოდით, რას ისურვებდით, რომ თქვენთვის ეთქვა?
- არ მჯერა არსების, სახელად - ღმერთი. ყველაზე კარგად ამ დამოკიდებულებას გადმოვცემ ყურანის სიტყვებით, რომ „ალაჰი თქვენთან უფრო ახლოა, ვიდრე თქვენი საძილე არტერია“. შესაბამისად, როგორ შეიძლება შევხვდე მას, ვინც ისედაც და ყოველთვის ჩემთანაა.
ფოტოგრაფი: ალექსანდრე სხულუხია.