„ინდონეზიის პირველ კატას“ საპრეზიდენტო დაცვა დაუნიშნეს

12 ივლისს ბობიმ კატების მოყვარულთა დღისადმი მიძღვნილ ღონისძიებაში მიიღო მონაწილეობა. ინტერნეტში გავრცელდა ვიდეო, სადაც ჩანს, როგორ მიაბიჯებს პრეზიდენტის ფუმფულა მეგობარი წითელ ხალიჩაზე პოლიციის ოფიცრების თანხლებით.

ამ კადრებს საზოგადოების მხრიდან განსხვავებული რეაქციები მოჰყვა. სოციალური ქსელების მომხმარებელთა ნაწილმა აღნიშნა, რომ სახელმწიფოს ხარჯზე ცხოველის მიმართ განსაკუთრებული დამოკიდებულება დაუშვებელია.

ამ საკითხზე კომენტარი სახელმწიფო მდივნის მოადგილემ, ჯური არდიანტორომ გააკეთა. მან აღნიშნა, რომ ბობი პრეზიდენტის პირად საკუთრებად მიიჩნევა, ამიტომ კანონით სახელმწიფო დაცვა ეკუთვნის.

ინდონეზიის პრეზიდენტის კატამ მსოფლიოს რამდენიმე ლიდერი უკვე მოხიბლა. მაისში ჯაკარტას ავსტრალიის პრემიერ-მინისტრი ენტონი ალბანეზი ოფიციალური ვიზიტით ეწვია და ბობის აჩუქა ყელსახვევი წარწერით: „ავსტრალიას უყვარს ინდონეზია“, — ამის შესახებ ინფორმაციას South China Morning Post ავრცელებს.

ცნობისთვის, ბობი ქუჩის კატაა. ის პრაბოვო სუბიანტომ (ინდონეზიის პრეზიდენტი 2024 წლიდან), დაახლოებით, ცხრა წლის წინ შეიფარა. ბობის საკუთარი სოციალური ქსელების ანგარიშები აქვს და მრავალრიცხოვანი გამომწერებიც ჰყავს.