ფეხბურთის მოყვარული მოზარდებისთვის საქართველოში AC Milan Camp Tbilisi იხსნება

Milan Camp Tbilisi 8 სექტემბერს დაიწყება და 14 სექტემბრამდე გაგრძელდება. ვარჯიშები საბურთალოს რაიონში, ნუცუბიძის პლატოზე არსებულ საფეხბურთო ცენტრში გაიმართება.

მონაწილეები ასაკობრივ ჯგუფებად დაიყოფიან (ჯამში, 3 ჯგუფი) და მათ ერთი კვირის განმავლობაში, AC Milan-ის ოფიციალური პროგრამით, საათნახევრიანი ინტენსიური ვარჯიშები ჩაუტარდებათ.

AC Milan Footbal Camp-ზე დასასწრები პაკეტის ღირებულება 800 ლარია (თითოეულ მონაწილეზე). ბილეთების საფასურში შედის: ტრენინგი, მონაწილეებისთვის „მილანის“ ოფიციალური სერთიფიკატისა და მერჩენდაიზის ფორმის (მაისური, შორტი, გეტრები) გადაცემა.

ბანაკი ადგილობრივი მწვრთნელებისთვის AC Milan-ის სემინარით გაიხსნება.

აღსანიშნავია, რომ პროგრამის მსვლელობისას მოხდება მწვრთნელების მიერ შეჩეული წარმატებული მოზარდების AC Milan-ის საერთაშორისო ბანაკებში უსასყიდლოდ მიწვევა, რაც ფეხბურთის მოყვარულ მოზარდებს, მსოფლიოს ერთ-ერთ ყველაზე წარმატებულ კლუბთან ერთად, უნიკალური გამოცდილების მიღების შესაძლებლობას მისცემს.

„მილანის“ აკადემია არის პროექტების ერთობლიობა, რომელიც მიზნად ისახავს ბავშვებისა და ახალგაზრდების ჩართვას სპორტულ აქტივობებში იმ საფეხბურთო ვარჯიშების საშუალებით, რომლებსაც საფეხბურთო კლუბ „მილანის“ ოფიციალური მეთოდოლოგია მოიცავს.

მრავალი წელია, რაც „მილანის“ ბანაკები მსოფლიოს სხვადასხვა წერტილში, რამდენიმე შერჩეულ ადგილას ტარდება. ისინი ყველა მონაწილეს სთავაზობენ შესაძლებლობას, გაიზიარონ უნიკალური გამოცდილება, რომლის ფარგლებშიც, შეიძენენ ახალ მეგობრებს, გაატარებენ სასიამოვნო დროს და ითამაშებენ ფეხბურთს სრულიად უსაფრთხოდ, ს.კ. “მილანის“ მაღალკვალიფიციური მენეჯერებისა და ადგილობრივი მწვრთნელების მეთვალყურეობის ქვეშ.

რეგისტრაციისთვის გადადით შემდეგ ბმულზე AC Milan Junior Camp Georgia