სამშენებლო კომპანია „რეფორმამ“ აუტიზმის ეროვნულ ცენტრს კოტეჯი უსასყიდლოდ გადასცა

სამშენებლო კომპანია, წლების განმავლობაში, დიდ ყურადღებას უთმობს კორპორატიულ სოციალურ პასუხისმგებლობას, რაც მის მიერ განხორციელებულ სხვადასხვა პროექტში აისახება.

„რეფორმას“ (ყოფილი „ენსისი“) დაარსების დღიდან, არაერთი პროექტი განვახორციელეთ კორპორატიული სოციალური პასუხისმგებლობის მიმართულებით. ეს, ფაქტობრივად, ჩვენი სტრატეგიის ნაწილია. უკანასკნელ პერიოდში კი, რებრენდირებული „რეფორმას“ კონცეფციით, ჩვენი აქტივობები და სტრატეგია სრულ თანხვედრაშია კომპანიის ღირებულებებსა და პოლიტიკასთან. ვგეგმავთ არაერთ საინტერესო პროექტს ახალგაზრდებისთვის მეტი შესაძლებლობების გაჩენის მიმართულებით, მათ შორის, განათლების სექტორში. რაც შეეხება, აუტიზმის მქონე მოზარდებს, მნიშვნელოვანია, მათ ჰქონდეთ მომავალში დამოუკიდებლად ცხოვრების შესაძლებლობა. ამ კეთილი მიზნისთვის ჩვენმა კომპანიამ არაერთი ძალისხმევა გასწია და მომავალშიც გავაგრძელებთ მათ მხარდაჭერას,“ - ამბობს კომპანიის - „რეფორმა“ დამფუძნებელი, გეგი ქელბაქიანი.

კომპანიის და აუტიზმის ფონდის მეგობრობა მრავალ წელს ითვლის. დიდია კომპანია „რეფორმას“ წვლილი აუტიზმის მქონე მოზარდების მშობლების მიერ ორგანიზებული საქველმოქმედო კონცერტების, გამოფენების და სხვადასხვა ღონისძიების განხორციელების დროს. ამ ეტაპზე კი, მათი დახმარებით, მოზარდებს ექნებათ კიდევ ერთი სივრცე, სადაც მათ მიეცემათ შესაბამისი სერვისების მიღების, განვითარების, საკუთარი ნიჭისა და უნარების გამოვლენის შესაძლებლობა.

აუტიზმის ეროვნული ცენტრის - „ფერადი ქალაქის“ მშენებლობა 15 წლის ზემოთ აუტიზმის მქონე მოზარდების მშობლებმა დაიწყეს. ცენტრი წარმოადგენს დიდ კომპლექსს, რომელშიც გათვალისწინებულია აუტიზმის მქონე ადამიანების დამოუკიდებელი ცხოვრებისთვის მოსამზადებლად ყველა კომპონენტი.

პროექტის მშენებლობა, მისი მასშტაბების გათვალისწინებით, დიდ თანხებთან არის დაკავშირებული. ფონდი მშობლების მიერ არის შექმნილი და მთლიანად დამოკიდებულია შემოწირულობებსა და კერძო სექტორის მხრიდან გაწეულ დახმარებებზე. ფონდის მიერ, თანხების მობილიზაციისთვის არაერთი საქველმოქმედო აქცია სწორედ კერძო და სახელმწიფო სექტორის, რიგითი მოქალაქეების ჩართულობით ჩატარდა.

ამჟამად ცენტრის ტერიტორიაზე კერძო სექტორის მხარდაჭერით აშენებულია სამი კოტეჯი. მიმდინარეობს მეოთხე კოტეჯის მშენებლობა.