დებატკლუბების გახსნა მთელი საქართველოს მასშტაბით

კახეთის მხარე განსაკუთრებული ჩართულობით გამოირჩევა, კერძოდ კი, სიღნაღის, საგარეჯოს, დედოფლისწყაროს და გურჯაანის მუნიციპალიტეტები. პროექტის ფარგლებში ახლა უკვე 60 დებატკლუბი იწყებს აქტიურ მუშაობას მთელი საქართველოს მასშტაბით. ამ ეტაპზე დაემატა ახალი კლუბები სვანეთში, სამეგრელოში, ზემო აჭარაში, მცხეთა-მთიანეთში და ქვემო ქართლში. გარდა ამისა, აქტიურად განახლდა მუშაობა საქართველოს სხვა რეგიონების დებატკლუბებში, კერძოდ, შიდა ქართლში, იმერეთში, კახეთში, რაჭაში, თბილისსა და აჭარაში.

პროექტის მესამე ფაზაში მოხდა მასწავლებლების შერჩევა მთელი საქართველოს მასშტაბით და, საბოლოოდ, შეირჩა მათი შეზღუდული რაოდენობა ძალიან მაღალი კონკურსის შედეგად. შესაბამისად, სკოლის მასწავლებლები, ხოლო შემდგომ მოსწავლეები ეუფლებიან მსოფლიოში პოპულარულ და ეფექტურ საგანმანათლებლო ინსტრუმენტს, ფორმალურ დებატებს. აღნიშნული სასწავლო პროგრამა კი შემუშავებულია საქართველოში ერთადერთი საერთაშორისო დებატების საგანმანათლებლო ასოციაციის წევრი ორგანიზაციის - საქართველოს დებატებისა და განათლების ინსტიტუტის - მიერ.

პროექტი „დებატები უკეთესი განათლებისთვის“ მიზნად ისახავს მოსწავლეებში თავისუფალი და დამოუკიდებელი მოქალაქის უნარების განვითარებას და ისეთი უნარ-ჩვევების ჩამოყალიბების ხელშეწყობას, როგორიცაა: კონსტრუქციული მსჯელობა, არგუმენტაცია, მასალების მოძიება, ორატორობა, გუნდურობა, დროის მართვა, ოპონენტის პატივისცემა და სხვა.