სინორი - განსაკუთრებული აჭარული კერძი 10 წუთში!

სინორის მოსამზადებლად საჭირო პროდუქტი:

„სომხური ლავაში“ - 1 ცალი

ნადუღი - 500 გრამი

კარაქი - 250 გრამი

მარილი - გემოვნებით

შაქარი და ნიორი - (სურვილის შემთხვევაში).

მომზადების წესი:

სინორის მოსამზადებლად ადრე, მაღალმთიან აჭარაში საფუარის გარეშე გამომცხვარი ცომის თხელ ფირფიტებს იყენებდნენ. ახლა სინორის მოსამზადებელი სპეციალური, გამზადებული ფირფიტების შეძენა სუპერმარკეტებში შეგიძლიათ, თუმცა ბევრი ამ უგემრიელეს კერძს „სომხური ლავაშისგან“ ამზადებს.
თუკი ფირფიტები მზად გაქვთ, სინორის გაკეთება, სულ რაღაც, ათ წუთს წაგართმევთ.

მაშ ასე, დავიწყოთ:

🔸 დაჭერით „სომხური ლავაში“ გრძლად, გადაახვიეთ რულეტებად, ისე რომ გადახვეული ფორმა რამდენიმე ფენისგან შედგებოდეს.

🔸მიეცით ლამაზი ფორმები და დააწყვეთ ოდნავ ღრმა საცხობ სინზე ან ჩააწყვეთ ქვაბში ვერტიკალურად.

🔸 ქვაბში გამდნარ კარაქს დაუმატეთ ნადუღი, დაამატეთ ოდნავ წყალი, რათა ნადუღი და კარაქი კარგად შეიზილოს ერთმანეთში, დაამატეთ ოდნავ მარილი და წამოადუღეთ. მიღებულ მასას პერიოდულად მოურიეთ, რომ არ დაიკრას და კარგად გაიხსნას. თუკი გსურთ, სინორს ნივრის გემო დაჰკრავდეს, დაუმატეთ გახეხილი ნიორი. როგორც კი სინორი ადუღდება და კარგად გაიხსნება, ცეცხლიდან გადმოდგით.

🔸 მომზადებული მასა „სომხური ლავაშისგან“ დამზადებულ რულეტებს დაასხით, ისე რომ ნახევრამდე დაიფაროს და შედგით კარგად გაცხელებულ ღუმელში, დაახლოებით, 3 წუთით.

🔸 როგორც კი შეამჩნევთ, რომ რულეტები ზემოდან მოიბრაწა, ღუმლიდან გადმოდგით და გამდნარი კარაქი მოასხით.

კერძი მზად არის!

შენიშვნა: თუ გსურთ, ტკბილი სინორი მოამზადოთ, ქვაბში მოთავსებულ მასას ადუღებისას დაამატეთ შაქარი გემოვნებით, ოღონდ გაითვალისწინეთ, რომ ნივრის დამატება საჭირო აღარ არის.

თუკი კერძი სტუმრებისთვის მოამზადეთ, სუფრასთან მიტანამდე, ღუმლიდან გამოღებული სინორი ღრმა თეფშზე გადაიტანეთ და გამდნარი კარაქი მოასხით.

გემრიელად მიირთვით!