ყურძნის წვენის შენახვა ზამთრისთვის

რჩევა - ზამთრისთვის ყურძნის წვენის მომზადება წვენსაწურის, წვენსახარშის ან ხორცსაკეპი მანქანის დახმარებით შეგიძლიათ, თუმცა უმჯობესია, ყურძენი ყოველგვარი ტექნიკის გარეშე, საკუთარი ხელით დაწუროთ.

ყურძნის წვენის მოსამზადებლად დაგჭირდებათ:

• შავი ყურძენი - 6 კგ.
• შაქარი - 100-200 გრ. (ყურძნის სიტკბოს მიხედვით)

ამ რაოდენობის ყურძნისგან მიიღებთ, დაახლოებით, 4 ლიტრ წვენს.

მომზადების წესი:

1. ყურძენი გამდინარე, ცივი წყლის ქვეშ კარგად გარეცხეთ და თუშფალანგზე გადაიტანეთ, რათა წყლისგან დაიცალოს. ამის შემდეგ ყურძენი დიდ ქვაბში ჩაყარეთ.

2. ქვაბს თავზე სახურავი დაახურეთ და ისე, რომ ერთი წვეთი წყალიც არ დაამატოთ, ძალიან დაბალ ცეცხლზე დაადგით. ყურძენი დაახლოებით 80 ºС - 90 ºС-მდე გააცხელეთ.

3. გაცხელებისას ყურძენი მოცულობაში შემცირდება, მისი მარცვლები დასკდება და წვენს გამოყოფს. შეგიძლიათ, პიურეს საჭყლეტით წვენის გამოყოფა დააჩქაროთ.

4. ცეცხლი გამორთეთ და წვენი გააგრილეთ, რათა დარჩენილი მარცვლების ხელით დაჭყლეტა შეძლოთ.

5. ყურძნის წვენი ორ ფენად დაკეცილ დოლბანდში გაწურეთ. წვენს შაქარი დაუმატეთ, ისევ ცეცხლზე დადგით და 1-2 წუთი ადუღეთ.

ამის შემდეგ ცხელ-ცხელი წვენი წინასწარ გასტერილებულ ქილებში ჩაასხით, მოხუფეთ და ერთი დღით თბილი პლედი დაფარეთ.

მეორე დღეს კი ქილები გრილ ადგილას გადაიტანეთ და შეინახეთ.

ასევე, დაგაინტერესებთ:

კომშის ჯემი ზამთრისთვის

ბროწეულის ნატურალური წვენი და მურაბა ზამთრისთვის

მწვანილის შენახვა ზამთრისთვის

ყაბაყის მწნილი სტერილიზაციის გარეშე