როცა ღირსება სიკვდილზე ძლიერია - თავმოკვეთილმა დიდებულმა 32 ნაბიჯი გადადგა!
14:00 ორშ. 16 აგვისტო, 2021 წელი
ეს ლამაზი ლეგენდა, რომელიც მე-14 საუკუნეში მცხოვრები გერმანელი დიდებულის ამბავს გადმოგვცემს, იმას გვიყვება, რომ შინაგანად ძლიერი და თავმოყვარე ადამიანი შეუძლებელს შეძლებს:
1336 წელს გერმანიის მეფემ ლუდვიგ IV ბავარიელმა სამეფო კარის დიდებულს დიც ფონ შაუმბურგს (diez von schaumburg) და მის ოთხ მეგობარს მეფის წინააღმდეგ შეთქმულებასა და არეულობის მოწყობაში დასდო ბრალი.
დიდებულებს თავის მოკვეთა მიუსაჯეს.
განაჩენის სისრულეში მოყვანამდე ლუდვიგ ბავარიელმა შაუმბურგს ჰკითხა, ჰქონდა თუ არა უკანასკნელი სურვილი.
დიდებულმა, რომელიც როგორც საკუთარ, ისე მეგობრების უდანაშაულობაში დარწმუნებული იყო, მეფეს წარმოუდგენელი თხოვნით მიმართა: ჩემი მეგობრები ერთმანეთისგან რვა ნაბიჯის დაშორებით, მწკრივად დააყენეთ. ჯერ მე მომკვეთეთ თავი. შემდეგ კი მე, თავმოკვეთილი, რამდენ მათგანსაც წინ ჩავუვლი, იმდენი შეიწყალეთო.
ეს რომ მოისმინა, მონარქმა გადაიხარხარა და სიკვდილმისჯილს უკანასკნელი სურვილის შესრულებას დაჰპირდა.
რამდენიმე წუთში ჯალათის მახვილმა ჰაერში გაიზუზუნა და ფონ შაუმბურგის ჭაღარა თავი მიწაზე დაგორდა, ტანი კი გასწორდა და, შეძრწუნებული მეფისა და დიდებულების თვალწინ, სიკვდილმისჯილების მიმართულებით წავიდა.
ზუსტად 32 ნაბიჯის შემდეგ, როცა თავმოკვეთილმა დიდებულმა უკანასკნელ სიკვდილმისჯილსაც ჩაუარა, სისხლისგან დაცლილი სხეული მიწაზე მოწყვეტით დაეცა.
ლუდვიგ ბავარიელმა პირობა შეასრულა და დიც ფონ შაუმბურგის ოთხივე მეგობარი გაათავისუფლა.
წყარო: steemit.com
სიახლეები ამავე კატეგორიიდან
info@bp.ge
+995595334912